17 номинации за наградата „4 Ноември“ во Битола; Партизанските гробишта остануваат неуредени

Во Битола, каде што Партизанските гробишта со години се во лоша состојба, за нешто повеќе од две недели ќе се одбележува 4 Ноември – Денот на ослободувањето на градот во 1944 година. Управниот одбор на Фондот за доделување на наградата „4 Ноември“ ќе одлучува кому годинава ќе ѝ ја додели оваа општинска награда, која го носи печатот на Народноослободителната борба.

17 предлози: од јавни установи до поединечни стручњаци и уметници

Наградата „4 Ноември“ се смета за едно од највисоките општински признанија за остварувања во различни области од општественото живеење. И годинава за наградата за едногодишни достигнувања пристигнал прилично голем број предлози — дури 17, меѓу кои има директори на јавни установи, како и институции предложени од нивните раководители.

Црвениот крст од Битола го предлага директорот на Казнено‑поправната установа „Затвор Битола“, Александар Јовковски, за наградата, меѓу другото, и поради помошта што ја обезбедил со ангажирање штитеници во реконструкцијата на објектот на Црвениот крст. Во образложението за номинацијата на Јовковски се наведува дека дал поддршка во „завршувањето на капиталниот проект, овозможувајќи сите потребни активности да се реализираат без никаков надоместок“. За истата награда е предложен и самиот затвор; за него се истакнува дека преку „редовната програма за ресоцијализација на своите штитеници“ помага со нивно ангажирање во установи и претпријатија од јавниот сектор во Општина Битола.

Од Црвениот крст, во телефонски разговор, објаснија дека приватни компании им барале високи суми за реконструктивните зафати, додека Затворот бесплатно ангажирал свои штитеници како резултат на долгогодишната соработка во хуманитарни проекти.

Покрај нив, меѓу предложените се Домот за доенчиња — предложен од директорката Билјана Анастасова за долгогодишниот хуман и професионален придонес во згрижувањето на најмладите; Јавната установа Национален парк Пелистер, предложена од Организацијата на жени од Битола за активностите за заштита и афирмација на Пелистер; и низа поединци и културни работници: анестезиологот д‑р Тања Струменковска‑Ристевска, спортистот и тренер Кире Марков, драматургот Билјана Крајчевска, професорите д‑р Горан Илиќ и д‑р Менде Солунчевски, авторот на документарни филмови Шенол Мемиш, хроничарот Зоран Ѓоргиев, педијатарот и неонатолог д‑р Маргарита Камбовска, организаторката на Бадниковата поворка Јасна Николовска, психологот Аница Златевски и Триото „Интерарт“. За наградата за животно дело се предложени актерите Соња Михајлова и Слободан Степановски, како и писателот Петре Димовски.

Во огласот за наградата се наведува дека таа се доделува на физички и правни лица како знак на општествено признание за значајни остварувања во различни општествени и научни дејности кои претставуваат посебен придонес за развојот на Општина Битола, Македонија и светот. Право да предлагаат кандидати имаат правни лица, здруженија на граѓани, групи граѓани и поединци. Управниот одбор на Фондот за доделување на наградата „4 Ноември“, кој одлучува за добитниците, го избира и го именува Советот на Општина Битола.

Минатата година доделувањето предизвика реакции откако признанието за едногодишни остварувања му беше доделено на фејсбук‑група претставена како портал. Годинава големиот број кандидати го потврдува значењето што „4 Ноември“ го има за битолчани, но и остава отворено прашањето за односот на градот кон местото каде што почиваат оние што ѝ ја донеле слободата на Битола: Партизанските гробишта сѐ уште чекаат достоинствено уредување, иако градот одбележува 82 години од ослободувањето.

Од Општина Битола и од Сојузот на борците изјавија дека за одржувањето е задолжено Јавното претпријатие „Комуналец“. Од таму, пак, велат дека нивна надлежност е само пристапната патека до гробиштата.

Фото: СДК.МК)