1.883 барања за ин‑витро во една година — 237 за четврти, петти и шести обид

Фондот за здравствено осигурување информира дека во последните 12 месеци биле поднесени и разгледани вкупно 1.883 барања за остварување на правото на биомедицинско потпомогнато оплодување (БПО).

Од нив, 237 се однесуваат на дополнителни обиди кои порано не беа предвидени за финансирање. „Од 237 поднесени барања, 216 се за четврти обид, 17 барања се за петти обид и 4 барања се за шести обид. Зад секоја од овие бројки стои семејство што добило уште една можност да продолжи таму каде што претходно системската поддршка завршувала“, се вели во соопштението од Фондот.

Кога влезе измената во сила

Измените на Законот за здравственото осигурување беа објавени во „Службен весник на РСМ“ бр. 144 од 17 јули 2025 година. По таа промена, Комисијата за БПО ја одржа првата седница на која можеа да бидат разгледувани барања за четврти, петти и шести обид на 7 август 2025 година.

За БПО постапки извршени во осум здравствени установи со кои Фондот има склучено договори, во 2025 година се реализирани повеќе од 97,3 милиони денари, се додава во извештајот.

Од Фондот посочуваат дека новото решение им дава можност на семејствата кои ги исцрпиле претходните рунди на јавна поддршка да поднесат барање за дополнителни обиди, а секое барање претставува нова шанса за обид за родителство.

Бројките ги опфаќаат барањата поднесени и разгледани во последните 12 месеци и ја илустрираат и побарувачката за помош при репродукцијата и непосредното влијание од носењето на законската измена.

Фото: прес-материјал од настанот