58 заболени од западнонилска треска во Македонија, осум починати
Повеќето заболени и сите смртни случаи се мажи; 55 од 58 случаи се од Скопје.
Заклучно до 8 август 2026 година, во земјата се регистрирани 58 случаи на западнонилска треска — 54 лабораториски потврдени и четири водени како веројатни — а досега починале осум лица, стои во најновиот извештај на Институтот за јавно здравје.
Во текот на изминатата недела (2-8.9.2026) пријавени се два нови случаи, од Скопје и Свети Николе, а регистрирани се и два нови смртни исходи од Скопје. Сите починати се мажи; просечната возраст е 71,9 години, сите биле хоспитализирани, а седуммина имале коморбидитети.
Од вкупно заболени 58 лица, 46 се мажи, а 12 се жени. Според место на живеење, 55 случаи се од Скопје, додека по еден случај е евидентиран во Велес, Куманово и Свети Николе.
Возрастна структура и клинички податоци
Повеќето случаи се автохтони — 57, додека еден случај има историја на патување во Грција, но инкубацискиот период ги покрива и престојот во Македонија. Најголем дел од заболени се постари лица: 47 (81,0 %) се над 60 години, седум се на возраст 50–59 години, едно лице е на возраст 30–39, а три лица се на возраст 20–29. Просечната возраст изнесува 66,1 години.
Од вкупно 58 заболени, 56 имале невроинвазивна болест и сите биле хоспитализирани — 55 се лекувале во УК за инфективни болести и фебрилни состојби, а еден пациент бил згрижен во „Аџибадем Систина“. Испишани се 43 пациенти или 76,8 % од хоспитализираните потврдени случаи; пет лица сè уште се на лекување во болница.
Западнонилската треска првпат е регистрирана во Македонија во 2011 година. Во периодот од 2011 година до крајот на 2025 година регистрирани се вкупно 54 лабораториски потврдени случаи и пет смртни исходи поврзани со болеста. Според извештајот, 2026 година бележи значително зголемување на бројот на заболени и починати во однос на претходните години.
Фото: прес-материјал од настанот
