Агон Ферати: недоволна искористеност на човечките ресурси и нарушена кохезија во Министерството за односи меѓу заедниците

Новиот министер за односи меѓу заедниците, Агон Ферати, на брифинг со новинарите соопшти дека при влегувањето во функцијата ги затекнал следните проблеми: недоволна искористеност на човечките ресурси и нарушена кохезија во рамките на институцијата. Тој додаде дека е еден од приоритетите да ја подобри перцепцијата на јавноста за министерството.

Според Ферати, делумно оправдана е негативната перцепција, бидејќи забележал повеќе недоследности во работењето и опремувањето на службите. Тој рече дека ги контактирал сите раководители за да побара препораки за унапредување на работата.

Реорганизација и нови оддели

Министерот најави реорганизација со формирање на два нови оддела: еден за стратешко партнерство, меѓународни односи и ЕУ грантови, и втор за анализа и истражување. „Некои сектори ќе се корегираат, со новата систематизација ќе креираме оддел за стратешко партнерство, меѓународни односи и ЕУ грантови, а другиот оддел ќе биде за анализа и истражување“, рече Ферати.

Ферати посочи и на недостигот од стратешки документи: досега биле донесени само два стратешки документа, и тие имаат важност од две години.

Во однос на својот претходник, министерот Иван Стоилковиќ — кој сега е избран да раководи со Министерството за локална самоуправа — Ферати упати критики дека не работел инклузивно и дека најголем дел од проектите биле наменети за организации поврзани со културни настани и промоција на српската заедница. „Човечките ресурси не биле искористени како што треба. Има недостаток на работна опрема. Од 140 вработени , 30-35 луѓе немаат компјутери. Сите вработени доаѓаат на работа, но идејата е да се подобри и внатрешната атмосфера, ги контактиравме сите раководители и побаравме препораки. Има нарушена кохезија по сите основи – верски, партиски и етнички“, кажа Ферати.

Во однос на распределбата на грантовите, министерот посочи на дисбаланс: „Не станува збор за големи финансиски средства, но од 36 грантови да речеме, 29 биле за српската заедница“, рече тој.

Ферати рече дека натамошниот фокус ќе биде на унапредување на институционалните капацитети, зголемување на ефикасноста и реализација на проекти кои промовираат толеранција и различност.

Фото: прес-материјал од настанот