АХВ потврди западнонилски вирус кај три угинати гаврани во Скопје и Ресен

Агенцијата за храна и ветеринарство (АХВ) соопшти дека од 24 до 27 август добила над 130 пријави за пронајдени угинати птици, а лабораториските испитувања досега потврдиле присуство на вирусот на западнонилска треска кај три птици: два угинати гаврани во Скопје и еден гавран во Ресен.

Од АХВ предупредуваат дека не сите пријавени примероци биле погодни за тестирање, бидејќи голем дел од птиците биле во напредна фаза на распаѓање и не дозволувале земање валидни примероци за лабораториска анализа.

Надзор и опфат

Агенцијата информира дека продолжува активниот надзор на терен за да утврди каде и во каков обем циркулира вирусот и да го процени ризикот од натамошно ширење. Надзорот ќе се спроведува низ целата држава и ќе опфати живина одгледувана во дворови и селски стопанства, птици чиишто мали групи се чуваат во оградени или затворени простории, како и водни птици во некомерцијални одгледувалишта.

Граѓаните се повикуваат да бидат внимателни и да пријават на АХВ доколку на едно место и во краток период забележат поголем број угинати гаврани или други диви преселни птици. За поединечни угинати птици во Скопје, пак, граѓаните треба да ги известат надлежните комунални служби, односно ЈП „Комунална хигиена“, за птиците да бидат собрани и соодветно отстранети.

АХВ посочува дека досегашното следење веќе потврдило дека вирусот циркулира меѓу птиците во Скопје, поради што поединечните случаи на угинати птици во Скопје нема потреба дополнително да се испитуваат лабораториски. Досега седум луѓе починаа од западнонилска треска во Македонија.

Фото: прес-материјал од настанот