Amela Memish Apostolovska: Mesazh nënëror dhe ditëlindje që u bë ditë inkluzioni

Psikologia dhe shkrimtarja Amela Memish Apostolovska përmes një postimi të hapur në rrjetet sociale iu drejtua publikisht atyre që, sipas saj, përhapin stigma, komentojnë sipërfaqësisht dhe mbulojnë dështimet institucionale që e vështirësojnë jetën e familjeve me fëmijë me autizëm.

Ajo foli ashpër për mënyrën si funksionon ndonjëherë ‘ndihma’ online dhe për ata që ofrojnë këshilla pa përvojë.

"Mjaft me pseudo‑ekspertët që kanë lexuar një libër, pastaj me filtra, botoks, kile pluhur dhe buzëqeshje false shpërndajnë urtësi në rrjetet sociale duke kopjuar tekstet e të tjerëve, përpunuar dhe publikuar vetëm për një like më shumë… Ata që nuk e kanë jetuar autizmin në të gjitha ngjyrat, që nuk kanë kaluar as 24 orë pa ndërprerje, e lëre më tri ditë, në një botë ku çdo çast është stuhi, frikë dhe pasiguri — nuk mund ta kuptoj me çfarë të drejte hapin gojën," shkroi ajo.

Nga vetmia në ditë inkluzioni

Ajo, nënë e dy fëmijëve, përmendi tre lloje stigme — publike, vetëstigmatizim dhe institucionale — dhe kritikoi mbështetjen e rremë nga personat e afërt që gjykojnë pas shpinës.

"Autizmi NUK SHËROHET me klişe dhe empati të rreme. Autizmi kërkon kuptim. Merruni me punën tuaj në profesion, dhe lejoni prindërit të marrin frymë!" përfundoi ajo.

Historia e familjes është e njohur: pas dhjetë vitesh vetmie dhe ditëlindjesh me karrige të zbrazëta, muajin e kaluar djali i saj Leon mbushi 13 vjeç, dhe festa në Parkun e Qytetit në Shkup u bë një shenjë për inkluzion. Qindra qytetarë dhe fëmijë qenë të pranishëm, dhe emra të njohur të estradës, përfshirë Tamara Todevskën, iu bashkuan ngjarjes.

"Dje festuam një fëmijë, një betejë të madhe, një dëshirë nënërore dhe një komunitet që tregoi se diferencat nuk duhet të na ndajnë por të na afrojnë. Leon mbushi 13 vjeç. Nga dje e tutje, dita jote e lindjes nuk është më vetëm e jotja — ajo u bë dita e inkluzionit!" shkroi ajo me emocion.

Ajo thotë se nuk do të heshtë përballë ngacmimeve të bashkëmoshatarëve dhe mangësive institucionale, duke theksuar se të gjithë fëmijët meriton të fluturojnë me krahët e tyre, edhe nëse ato duhen rindërtuar shumë herë.

Foto: material shtypi nga ngjarja