Америка тајно депортира мексикански мигранти во Гватемала и во Хондурас

Администрацијата на Доналд Трамп со месеци депортира мексикански државјани во различни земји од Централна Америка, иако Мексико е подготвено да ги прими сите свои граѓани кои се протерани од САД, велат американски официјални лица.

Двајца претставници на американското Министерство за внатрешна безбедност, кои побарале да останат анонимни, изјавиле дека имиграциските органи испраќаат некои од депортираните Мексиканци во Гватемала и во Хондурас, наместо да ги вратат директно во Мексико.

Стотици префрлени, точен број непознат

Според овие извори, операцијата се одвива веќе неколку месеци и во Гватемала и во Хондурас биле испратени стотици мексикански државјани, но точниот број не е објавен. Една од целите, велат американските власти, е да се обесхрабрат мексиканските граѓани од повторно илегално влегување во САД.

Мексиканското Министерство за надворешни работи го изрази своето остро несогласување: "Владата на Мексико го прифаќа враќањето на сите свои државјани. Затоа, се спротивставува на депортирањето мексикански државјани во трети земји и нема таков договор", порача Министерството и додаде дека превзема мерки за безбедно и достоинствено враќање на своите граѓани.

Портпарол на американското Министерство за внатрешна безбедност изјави дека администрацијата "ги користи сите законски можности за спроведување на најголемата депортациска операција во историјата", како што ветил претседателот Трамп.

Експертите за миграциска политика потсетуваат дека САД во минатото ги префрлале мексиканските мигранти фатени на јужната граница во внатрешноста на Мексико за да ги обесхрабрат повторните обиди, но додаваат дека пракса да се испраќаат Мексиканци во други земји од регионот е без преседан. Засега Владите на Гватемала и на Хондурас немаа јавна изјава по наводите.

Фото: прес-материјал од настанот