Американска дојава: ФСБ приведе малолетник осомничен за планиран напад во Царицино

Руските безбедносни служби соопштија дека информација добиена од Соединетите Американски Држави довела до приведување на малолетник кој наводно подготвувал напад во музејскиот комплекс „Царицино“ во Москва.

Од Федералната служба за безбедност (ФСБ) велат дека, заедно со Руската гарда, Министерството за внатрешни работи и Истражниот комитет, ги провериле податоците доставени од американската страна и презеле мерки кои резултирале со приведување.

Според Центарот за односи со јавноста на ФСБ, приведениот е малолетен руски државјанин кој на платформата за кратки видеа TikTok објавил фотографии на кои е облечен во маскирна облека, со фантомка, капа, очила и слушалки, држејќи предмет налик на автоматско оружје. "Тој објавил и фотографии направени во музејскиот комплекс 'Царицино', со натпис: 'Најдов место'."

ФСБ ѝ благодари на американската страна

ФСБ ѝ се заблагодари на американската страна за доставените информации за подготовка на терористичкиот напад во Москва и соопшти дека се преземаат соодветни мерки. Претходно агенцијата најави дека добила информации од САД за подготовки за напад во руската престолнина.

Во соопштението беше наведено и потсетување на смртоносниот напад во концертната сала „Крокус“ на 22 март 2024 година, во кој загинаа над 140 лица. Властите велат дека остануваат во состојба на повишена готовност додека трае истрагата поврзана со случајот од TikTok.

Фото: прес-материјал од настанот