Американски суд ѝ наложи на „Мета“ да плати 567 милиони долари за штети нанесени на младите

Судија во Ново Мексико ѝ наложи на матичната компанија на Фејсбук, „Мета“, да плати 567 милиони долари за санирање на штетите што, како што пресуди, ги предизвикале нејзините платформи врз младите.

Судијата Брајан Бидшајд утврдил дека платформите на „Мета“ претставуваат „јавна опасност“ и дека компанијата се вклучила во активност што „ги нарушува јавното здравје, безбедноста и добросостојбата“ во Ново Мексико.

Во образложението тој предупредува дека компанијата е значаен фактор во локалната криза со менталното здравје на младите и ја споредил со индустриски загадувач: „Иако ’Мета‘ не е единствена во овој поглед, нејзините социјални платформи се значаен фактор што придонесува за моменталната криза со менталното здравје кај младите во Ново Мексико", напиша судијата.

Паралела со фабрика за загадување

Во пресудата Бидшајд ја проширува споредбата: судот ги смета платформите на „Мета“ за аналоги на фабрика, а рекламите и другите содржини прикажани на тие платформи за она што го произведува фабриката. Тој го споредил психолошкото оштетување и сексуалната експлоатација на децата со загадување што треба да се сузбие: „Судот ги смета платформите на ’Мета‘ за аналогни на фабрика, рекламите и другите содржини прикажани на тие платформи за она што го произведува фабриката, а психолошката штета и сексуалната експлоатација на децата за загадување што мора да се сузбие", се наведува во пресудата.

Судијата додава дека штетите не останале само онлајн, туку се прошириле на интернетот и во реалниот свет, создавајќи заеднички општествен товар за погодените деца, нивните семејства и училишта, како и за болниците и спроведувачите на законот. "Наместо тоа, штетните ефекти се шират на целиот интернет и, што е можеби најзагрижувачки, во реалниот свет, создавајќи заеднички, општествен товар и штета за погодените деца, нивните семејства и училиштата, како и за болниците и спроведувачите на законот", се наведува во пресудата.

Пресудата точно ги распределува средствата: 420 милиони долари ќе бидат наменети за услуги за третман на младите, а остатокот за подигање на свеста и превенција, услуги за скрининг и други трошоци. Оваа одлука ја дополнува сумата од 375 милиони долари што на „Мета“ ѝ беше наложено да ја плати за истиот случај во март.

Портпаролот на „Мета“, Енди Стоун, изјави дека компанијата не се согласува со пресудата и дека ќе поднесе жалба. "Работиме напорно за да ги заштитиме луѓето на нашите платформи и бевме транспарентни во однос на предизвиците за идентификување и отстранување на лошите актери и штетните содржини. Остануваме сигурни во нашиот биланс на заштита на тинејџерите на интернет и ќе продолжиме да се браниме од тврдењата што поинаку ги прикажуваат фактите", напиша тој на X.

Фото: прес-материјал од настанот