Анализи: во водата на езерото Младост нема цијанобактерии, но е потребно продолжено следење

Анализите на Хидробиолошкиот завод (ХБЗ) од Охрид, порачани од Општина Велес, покажаа дека во водите на акумулацијата Младост нема цијанобактерии и со тоа не се очекува присуство на цијанотоксини. Примероци беа земени на 2 септември од две локации: Градска плажа и плажата пред хотел „Романтик“.

„ Во анализираните примероци од овој месец не беше утврдено присуство на цијанобактерии, па не се очекува продукција на цијанотоксини од цијанобактериско потекло. Сепак, поради сезонската динамика на ф итопланктонот и можноста за брзи промени при поволни температурни и нутритивни услови, се препорачува продолжено следење на цијанобактериите и цијанотоксините во текот на следната сезона“, пишува во извештајот на ХБЗ.

При фитопланктонската анализа беше забележана изразена застапеност на зелените алги, значително присуство на харофитната алга, како и присуство на динофлагелати на испитаните локации.

Пред две години, во извештај на ХБЗ, беше констатирано присуство на цијанобактерии што доведе до забрана за капење, полевање и рекреативна употреба на водата. Во текот на летните контролни мерења, Центарот за јавно здравје Велес бараше вакви испитувања; досега во земјата немаше акредитирана лабораторија за овие анализи, па еколошките здруженија предложија испитување во Нови Сад или Љубљана пред на крајот анализите да се направат во ХБЗ.

Подобрувања на сливот и подготовка на пумпни системи

Анализата на двете плажи покажа дека водењето по микробиолошки индикатори е одлично. По физичко‑хемиски параметри, присуството на амонијак е во 4-та класа, матноста и сувиот остаток во 3-та класа, додека останатите испитани параметри се во втора и прва класа. Летоска водата беше дозволена за полевање на околните површини со лозја.

Деновиве заврши чистењето на вториот дел од коритото на Отовичка река во должина од 800 метри; претходно беа исчистени 460 метри. Отстранети се трска, шавар, кал и отпад, со што се зголеми пропусната способност на реката и се намали наносот што стигнува до акумулацијата. Во завршна фаза е и поврзувањето на електричната енергија со пумпите од бушотините ископани на Отовичка и Рудничка река — водата ќе се доведува со црева до акумулацијата, а завршетокот на овој зафат се очекува за десетина дена.

P. ПЕЧКОВ

Фото: СДК.МК)