Ангелов: Не се намалува жестината на пожарите, група намерно го распалува огнот кај Китка

Жестината со која се појавуваат пожарите на отворен простор не се намалува, изјави директорот на Дирекцијата за заштита и спасување Стојанче Ангелов, додавајќи дека во текот на вчерашниот ден имало вкупно 31 пожар — безмалку сите предизвикани од човек, најголем дел ненамерно од небрежност, а одреден број намерно и со умисла.

Ангелов рече дека институциите работат на откривање на потпалувачите и апелираше до граѓаните да пријават секое сомнително однесување. Особено ги повика на внимателност жителите на подножјето на планината Китка, по Драчево, на територијата на општината Студеничани, бидејќи имале индиции дека на тоа место одредена група секојдневно повторно го распалува огнот додека екипите се обидуваат да го изгаснат.

Состојбата на теренот

„Во текот на денешниот ден дејствуваме со ер-тракторите на Дирекцијата и со полицискиот хеликоптер. На неколку правци е постигнат значаен напредок, во овој момент не е загрозено ниту едно село кое што се наоѓа околу линијата на пожарот“ изјави Ангелов.

Пожарот што вчера избувна во атарот на село Долно и село Горно Чичево беше многу комплексен и зафати голема површина — претежно сува трева, грмушки и трња. Доцна синоќа пожарникарите успеаа да го стават под контрола, а веднаш потоа и целосно да го изгаснат.

Активна е и депонијата во Кавадарци, каде што има пожарникари на терен и два БТР-а на Дирекцијата кои можат да помогнат со ладење доколку е потребно.

Локален функционер Јанчев се сомнее дека пожарот на кавадаречката депонија е подметнат и го нарече „напад врз градот“. Институциите продолжуваат со истраги и повторно апелираат до граѓаните да го пријавуваат секое необично движење околу линиите на пожарот.

Фото: Фејсбук