Ангелов: Опасноста од пожари останува висока, екипите интервенираат кај Струга, Боговиње и Штип

Директорот на Дирекцијата за заштита и спасување (ДЗС), Стојанче Ангелов, предупреди дека опасноста од пожари во земјата останува исклучително висока и дека нивниот голем број секојдневно ги исцрпува пожарникарите и службите на терен. Тој посочи дека само вчера беа регистрирани 26 пожари на отворен простор, а екипите интервенираат на неколку локации низ државата.

Активни пожари и интервенции

Во Општина Струга е активен тежок пожар кај селата Локов и Буринец, каде гори низкостеблеста шума, грмушки и трње со ризик да зафати и квалитетна шума. На терен се екипи на Национални шуми, а Ангелов рече дека се разгледува можност за интервенција со хеликоптер, чија употреба е ограничена поради високите дневни температури.

Доцна синоќа во Општина Боговиње, во околината на селата Урвич и Јеловјане, состојбата била драматична — огнот се приближил до селото Јеловјане на надморска височина од 1 400 метри. Благодарение на брзата интервенција на тетовските пожарникари и на локалното население, огнот бил сопрен на патот и состојбата сега е стабилна. "Во овој момент состојбата таму е стабилна, огнот е ставен делумно под контрола и не загрозува ниедно населено место, ниту, пак, е зафатена квалитетна шума", истакна Ангелов во пладневната видеоизјава за состојбата со пожарите.

За пожарот во Општина Штип, кај селото Селце, во близина на вештачкото езеро Мантово на планината Серта, што избувна вчера, гаснат штипските пожарникари и доброволниот огнен тим на ДЗС. Утрово дејствувал и полициски хеликоптер, кој помогнал да се стави под контрола еден крак од огнот. "Очекувам во текот на денот да биде ставен под целосна контрола, а веднаш потоа и целосно изгаснат. Зафатена е претежно ниска вегетација: трева, трње, грмушки и друг тип на ниска вегетација", рече Ангелов.

Тој упати апел за максимална претпазливост, нагласувајќи дека вегетацијата е сува и дека доволна е само една искра за да се предизвика катастрофа. "И покрај тоа што денес е 1 септември и почнува учебната година, опасноста од пожари сѐ уште не е намалена. Апелирам до граѓаните да бидат исклучително внимателни", додаде Ангелов.

Властите посочуваат дека постојаниот голем број на пожари ги натоварува ресурсите за гаснење и другите служби и дека се следат условите на терен за да се прераспоредат екипи каде што е најпотребно.

Фото: прес-материјал од настанот