Артан Груби лично потпишал одлука за продажба на државните акции во Стопанска банка АД Битола, обвини Влен
Влен објави записници и Одлука од Службен весник и тврди дека приватни купувачи блиски до Али Ахмети и заем од Алта банка се дел од операцијата.

Владејачката Влен објави документи и обвинува дека првиот вицепремиер Артан Груби лично ставил потпис на одлука со која државните акции во Стопанска банка АД Битола се ослободуваат за продажба.
Според партијата, потписот е дел од заклучок на 158. седница на Владата одржана на 6 јуни 2023 година, на која биле присутни министерот за финансии Фатмир Бесими, министерот за надворешни работи Бујар Османи и министерот за економија Крешник Бектеши. Влен ја објави и одлуката објавена во "Службен весник" број 123 од 13 јуни 2023 година, под Одлука број 41-3733/8.
Во соопштението партијата ја формулираше својата теза во три дела и ги приложи натписниците како доказ:
“Еве како функционирала државно-партиската машинерија на Али Ахмети: На 6 јуни 2023 година се одржува 158-та седница на Владата, со која претседава Првиот вицепремиер Артан Груби заедно со Димитар Ковачевски. На масата седи комплетниот политички и економски врв на ДУИ – министерот за финансии Фатмир Бесими, министерот за надворешни работи Бујар Османи и министерот за економија Крешник Бектеши. Под точка 5 од дневниот ред, токму во овој состав, се разгледува Информацијата за продажба на акциите во сопственост на Агенцијата за управување со одземен имот и под заклучок број 6 се носи Одлука за давање согласност за продажба на државните акции во Стопанска банка АД Битола! И погледнете кој се потпишува на оваа одлука – во „Службен весник“ број 123, под Одлуката број 41-3733/8 за продажба на акциите на Стопанска банка АД Битола, стои лично потписот на десната рака на Али Ахмети – Артан Груби!“
Од Влен го повторија тврдењето дека сватот на Али Ахмети преку компанијата „АС Сењак“ купил пакет акции во битолската банка, а поврзана фирма повлекла пет милиони евра кредит директно од централата на Алта банка во Белград. Партијата тврди дека и државните акции што биле ослободени со потписот на Груби и приватните пакети на сватот на Ахмети завршиле кај притворениот српски бизнисмен Давор Мацура.
Барања за проширување на истрагата
Влен повика Јавното обвинителство и Управата за финансиско разузнавање да ја проширaт истрагата, да ги повикаат сите поранешни функционери на ДУИ кои учествувале во подготовката и потпишувањето на овие решенија и да утврдат кривична одговорност. Партијата и упати прашања до Али Ахмети, Фатмир Бесими и Бујар Османи дали веќе на 6 јуни 2023 година бил подготвен планот банката да се подготви за преземање од страна на Алта банка – Белград.
Во одговор, Демократската унија за интеграција (ДУИ) преку писмено соопштение обвини дека владата предводена од ВМРО-ДПМНЕ и Влен се обидуваат да ја префрлат одговорноста за продажбата на Стопанска банка АД Битола напред, и додадоа: "Алта банка е ваше дете, не можете да го оставите пред туѓа врата".
Фото: Принтскрин


