Автобуска несреќа кај Мезокерешеш: 12 загинаа, 10 тешко повредени

Ноќта помеѓу сабота и недела, околу 1 часот по полноќ, автобус со полски аџии кои се враќале од Меѓугорје излета од патот, падна во канал и се преврте во близина на Мезокерешеш во Унгарија. Од вкупно 57 патници, 12 загинаа, а 10 се тешко повредени и префрлени во болница.

Спасувачите влегуваа преку прозорците за да ги извлечат заглавените

На местото на несреќата веднаш почнаа спасувачки операции, тимови ги извлекуваа патниците преку прозорците и ги ослободуваа оние што беа заробени под седиштата и остатоци. Тешко повредените беа пренесени во најблиските здравствени установи.

Полицијата соопшти дека возачот е приведен бидејќи се сомничи дека заспал на воланот, а истражителите работат на утврдување на точните околности околу излетувањето од патот. Оваа несреќа е опишана како најтешката автобуска несреќа во Унгарија во последните 23 години.

Една од повредените патнички, Хелена Тлучек, ги опиша хаотичните моменти по превртувањето на возилото: „Автобусот само се преврте, се преврте и јас се удрив во главата, но бев доволно свесна за да разберам што се случило бидејќи сите седишта беа искинати. Луѓето беа под седиштата, сите врескаа и бараа помош. И јас бев повредена, рамото ми беше скршено, ребрата ми беа скршени, а ‘рбетот ми беше повреден“.

Таа додаде дека спасила и други патници: „Ја извлеков сестра ми, или поточно ја повлеков за нозете и ѝ реков - спаси се со рацете, а јас ќе те повлечам за нозете. Го зграпчив и ременот на човекот кој беше прикован под седиштето и го извлеков на тој начин. После тоа, се струполив“, додаде Хелена.

Истражителите продолжуваат да ја обработуваат локацијата и да ги испитуваат преживеаните додека се обидуваат да го утврдат точниот тек на настаните. Надлежните засега не објавија дополнителни информации за идентитетот на жртвите.

Фото: Принтскрин/Икс