Балканските пекарници се шират низ Германија

Крцкаво лиснато тесто, кремасти десерти и мешани мириси на кафе и зачин — така изгледа внатрешноста на „Балкан Бејкери“ во Равенсбург која работи од крајот на јули. Сопственичката Имране Бафтиу, 42-годишна мајка на две деца чијашто семејство како гастарбајтери потекнува од Косово, вели дека сакаше да отвори место што ќе потсетува на родниот крај и ќе им биде пријатно на сите посетители.

Трендот и причините

Во пекарницата се нудат бурек со сирење и спанаќ, кремпита и други слатки, но и брзи залакчиња и ќебапчиња. „Мојата цел беше да создадам место каде што луѓето ќе се чувствуваат пријатно“, вели Бафтиу, и додава дека асортиманот опфаќа специјалитети од повеќе балкански земји, не само од Косово.

Слични објекти сѐ почесто се појавуваат во германските градови. „Забележуваме растечки број на пекарници од Балканот“, вели Франк Заутер, раководител на Здружението на пекарите во покраината Баден-Виртемберг, и напоменува дека и турските пекарници се раширени.

Културологот Гунтер Хиршфелдер од Универзитетот во Регнсбург го поврзува растот со промена на навиките во исхраната. „Многу традиционални пекарници се затвораат, а во исто време се менуваат и навиките во исхраната“, вели тој и нагласува дека големите класични оброци сè повеќе се заменуваат со помали ужини. „Токму таа празнина ја пополнуваат балканските пекарници."

Локацијата има значење: растечки трошоци и недостиг од персонал ги притискаат класичните пекарници, додека сеуште има слободни деловни простории во центарот на градовите. Во меѓувреме, втората и третата генерација на семејства од поранешна Југославија, Романија и Бугарија, кои израснаа во Германија, отвораат фирми и ја промовираат својата гастрономска култура.

Развојот создава конкурентност за традиционалните пекарници, вели Заутер, но тој не го гледа како директна закана. Новите пекарници привлекуваат делумно поинаква клиентела, а класичните пекарници обично имаат поширок избор лебови и традиционални слатки. „Штета е што толку малку од нив го наоѓаат патот до нас", вели Заутер за зачленувањето во здруженијата. Централното здружение на германското пекарство нагласува дека двата типа може да коегзистираат и дека понудата одразува повисоко ниво на интернационализација во Германија.

Во Равенсбург, Бафтиу се обидува да ги спои рецептурите од семејната традиција со германските класики — интегрални лебови и печива од баварско тесто — така што, како што вели, „Сакам навистина секој да може да најде нешто за себе."

Фото: прес-материјал од настанот