Берлин предлага да ја преполови годишната квота за работници од Западен Балкан
Работодавачите и агенцијата за вработување предупредуваат дека од 2027 год. намалувањето на квотата ќе ги погоди угостителството, логистиката и градежништвото.
Берлин подготвува предлог со кој годишната квота за работници од Западен Балкан би била преполовена, што според германските работодавачи и Сојузната агенција за вработување може да го продлабочи и онака изразениот недостиг од работна сила.
Предлогот се однесува на работни мигранти од Албанија, Босна и Херцеговина, Косово, Црна Гора, Северна Македонија и Србија — кои досега имаат пристап до дел од годишната квота од 50.000 места. Критичарите предупредуваат дека ограничувањето ќе ги погоди секторите каде овие работници најчесто се вработуваат, како угостителство, логистика и градежништво.
Сигнали за ризик од работодавачите и агенцијата
Во реакција на предлогот, Сојузот на германски здруженија на работодавачи (БДА) наведува дека таков чекор не е оправдан додека побарувачката за работна сила останува висока. БДА, меѓу другото, посочува дека и зголемувањето на јавните инвестиции во градежниот сектор може да биде „осуетено“ ако компаниите останат без потребниот кадар.
Ванеса Ахyја, член на Управниот одбор на Сојузната агенција за вработување задолжена за меѓународни прашања, предупредува дека преполовувањето на квотата би ослабело успешен модел на доселување со висок степен на интеграција на пазарот на трудот. „Натамошното намалување на квотата дополнително би им го отежнало на компаниите пристапот до работна сила“, се наведува во нејзиниот став.
Пратеничката Сандра Карстенсен, која долго време работела во менаџментот на аеродромскиот сектор, порача дека Регулативата за Западен Балкан треба да остане во сила во сегашната форма. „Со оглед на недостигот од квалификувана работна сила, правилото повеќе треба да го прошириме отколку да го ограничуваме", смета Карстенсен.
Регулативата за Западен Балкан беше воведена во 2016 година и во 2024 беше удвоена на 50.000 места годишно. Сегашната црвено‑црна коалиција во Берлин сега разгледува преполовување на таа квота од 2027 година, и критичарите од бизнисот и агенцијата тврдат дека тоа ќе го отежне пристапот на германските компании до потребната работна сила.
Фото: прес-материјал од настанот
