Бесплатни кошаркарски тренинзи за деца од 10 до 14 години во Пробиштип

На 15.10.2026 беше објавен проектот „Кошарка за секое дете“ кој во Пробиштип нуди бесплатни тренинзи за момчиња и девојчиња од 10 до 14 години. Уписите се отворени до 30 октомври 2026, а проектот го реализира компанијата „Булмак 2016″ во соработка со градоначалникот на Општина Пробиштип, Тони Тоневски.

Родителите ќе бидат ослободени од сите трошоци за учество. Во рамките на проектот ќе бидат обезбедени топки за кошарка и реквизити за работа, а за натпреварувачите кои влезат во селекциите ќе се обезбеди и кошаркарска опрема.

Според планот, децата ќе се натпреваруваат во категориите М12 и М14 во системот на Македонската кошаркарска федерација, со цел да добијат редовни тренинзи и натпреварувачко искуство.

Тренерски тим и услови за работа

Програмата за работа ќе ја изработи младинскиот селектор Александар Јованчев, кој ќе го следи и тренажниот процес заедно со неколку локални кошаркарски тренери. За условите за работа во рамките на проектот ќе биде задолжен раководителот на флотација при компанијата Булмак 2016 и поранешен кошаркар Давор Тоневски.

Пробиштип располага со две кошаркарски сали со услови за тренинзи и за одржување младински натпревари. По завршувањето на уписите, кои траат до 30 октомври 2026, ќе се формираат групите и ќе се објават термините за тренинзи и натпревари.

Проектот е предвиден да трае четири години или еден олимписки циклус. Покрај целта за учество и пласман во завршниците на турнирите во категориите М12 и М14, долгорочната намера е да се создадат услови за развој на деца кои во иднина би можеле да станат репрезентативци и професионални кошаркари. Со проектот „Кошарка за секое дете“ „Булмак 2016″ ја обележува 10-годишнината од постоењето и ја продолжува поддршката за спортот како дел од својата општествена одговорност.

Родителите на момчиња и девојчиња од 10 до 14 години може да ги пријават своите деца до 30 октомври 2026. За пријавување и дополнителни информации: Никола Пеншов (070/249-331) и Александар Бранковски (075/333-531).

Фото: прес-материјал од настанот