Бојан Илиевски се појави во Сава центар со мистериозна дама

Победникот на „Ѕвездите на Гранд“, Бојан Илиевски, привлече внимание во Белград откако се појави во придружба на мистериозна дама на комеморативниот концерт посветен на Тома Здравковиќ во „Сава центар“.

Илиевски пристигна со привлечна бринета облечена во елегантен црн мини-фустан; таа постојано беше покрај него и брзо стана предмет на интерес кај публиката и новинарите. Парот одлучи да го задржи својот приватен живот далеку од очите на јавноста.

На прашањата за емотивниот живот, Илиевски одговори воздржано пред репортерите: „Видете, за тоа ќе зборуваме малку подоцна. Нема ништо да откриваме засега. Кога ќе дојде вистинското време, ќе откриеме сè“, изјави Илиевски со насмевка.

Вечер полна емоции и аплаузи

На сцената, Илиевски приреди впечатлив настап со хитови на Тома и ја освои преполната сала. По концертот ги опиша впечатоците како длабоко емотивни: „Преубаво си поминав и ми беше исклучителна чест што бев дел од овој концерт, што пеев и што запознав нови луѓе. Осетив неверојатна емоција, сè беше премногу емотивно – особено кога Дарко Лазиќ се спушти до сопругата на Тома Здравковиќ. Сите пееја во еден глас, овациите не престануваа и целата сала беше на нозе. Кога почнав да пеам, почувствував неверојатна енергија“, ги сподели свои впечатоци Бојан по настапот.

Прашан за односот со поранешниот ментор Ѓорѓе Давид, Тој кратко изјави дека сака да остане посветен на кариерата: „Јас сум уметничка душа, музичар и сакам кариерата да ја градам исклучиво врз основа на тоа со што се бавам – музиката“.

Покрај вниманието околу новата врска, зад гласот кој ги воодушеви гледачите стои тежок животен пат. Во гостувањето во емисијата „Кафе муабети“ на „Гламур“ тој отворено зборуваше за личните битки и за трагичната загуба на родителите. Со емотивни сеќавања се присети на последната средба со мајката во Словенија, каде ги заврши музичките студии, и на нејзината смрт во 2021 година — ветување кое ѝ го дал тогаш му останува како најголем мотив да не се откаже од музиката.

Фото: прес-материјал од настанот