Bozhinovska dhe Petrova diskutuan për thellimin e bashkëpunimit energjetik mes Maqedonisë dhe Bullgarisë

Ministrja e Energjisë, Minierave dhe Burimeve Minerale e Maqedonisë së Veriut, Sanja Bozhinovska, u takua në margjinat e Samitit të dytë ministror të Maqedonisë së Veriut, Bullgarisë, Greqisë dhe Serbisë në Beograd me kolegen e saj bullgare, Iva Petrova, për të diskutuar thellimin e bashkëpunimit energjetik mes dy vendeve.

Gjatë bisedave u theksua nevoja për lidhje më të forta midis kompanive dhe institucioneve të të dy vendeve. Prioritet u vendos për bashkëpunimin mes MEPSO, NOMAGAS dhe MEMO dhe partnerëve të tyre bullgarë, me qëllim shkëmbimin e njohurive dhe zhvillimin e aktiviteteve konkrete të përbashkëta.

Interkoneksionet, sistemet bateriake dhe integrimi i tregut

U diskutua iniciativa lindje–perëndim, ku është parashikuar ndërtimi i një interkoneksioni shtesë midis sistemeve transmetuese të Maqedonisë së Veriut dhe Bullgarisë, si dhe përmirësime të mundshme të interkoneksionit ekzistues me Greqinë, me synimin e forcimit të shkëmbimit rajonal të energjisë dhe sigurimit të furnizimit.

Sistemet bateriake për ruajtjen e energjisë elektrike ishin gjithashtu temë e bisedimeve. Bozhinovska kërkoi përvojat e Bullgarisë lidhur me zgjidhjet teknike, rregulloren, financimin dhe realizimin e këtyre projekteve; Petrova u shpreh e gatshme t'i ndajë përvojat, ekspertizën dhe njohuritë teknike me institucionet dhe kompanitë maqedonase.

"Në kuadër të takimit u mbulua edhe çështja e varfërisë energjetike, duke shkëmbyer përvoja për masat dhe politikat që mund të kontribuojnë në sigurimin e energjisë më të përballueshme dhe të sigurt për qytetarët. Ministrat shkëmbyen mendime për planet dhe projektet energjetike të së ardhmes të dy vendeve dhe lidhjen e tyre me prioritetet rajonale. U shqyrtua edhe mundësia e një qasje të përbashkët para institucioneve ndërkombëtare financiare dhe dhuruesve për sigurimin e fondeve për projekte strategjike dhe me rëndësi rajonale,"

njoftoi Ministria e Energjisë, Minierave dhe Burimeve Minerale.

Ministrat po ashtu biseduan për vijimin e bashkëpunimit të nisur për përmirësimin e lidhjes së tregjeve të energjisë elektrike dhe avancimin e shkëmbimit ndërkufitar të energjisë, me qëllim prezantimin e projekteve të përbashkëta para financuesve ndërkombëtarë.

Foto: MIA