Британската метеоролошка служба: 2027 може да биде најтоплата година досега

Метеоролошката служба на Велика Британија предупреди дека феноменот Ел Нињо, кој се развива над Тихиот Океан, веројатно ќе биде ненормално силен и во комбинација со човековите климатски промени може да ја направи 2027 година најтопла досега.

Ел Нињо е природен метеоролошки феномен што се јавува на секои две до седум години и трае околу една година, но сегашните мерења покажуваат дека температурите на површината на морето во клучниот дел од Тихиот Океан се повеќе од два степена над повеќегодишниот просек — значително над прагот од 0,5 степени кој научниците го користат за прогласување Ел Нињо.

Предупредувања за необично силно затоплување во тропскиот Пацифик

„Мора да бидеме јасни: ова е невиден настан. Никогаш не сум видел толку силен сигнал за Ел Нињо во нашите прогнози“, изјави професорот Адам Скеиф, раководител на долгорочното предвидување во Метеоролошката служба.

Британските прогнози укажуваат дека ова затоплување би можело да надмине три степени додека Ел Нињо се приближува кон својот врв; некои други климатски организации предвидуваат уште поекстремни вредности, можеби дури 4 степени над просекот.

„Доколку се случи тоа, не е невозможно да го имаме најсилниот Ел Нињо во последните 500, па дури и 1.000 години“, вели Ник Хаусфадер, климатолог во американската истражувачка организација „Беркли Ерт“. Д-р Ник Данстон, климатолог во британската Метеоролошка служба, смета дека ова би можело да доведе до зголемување на глобалните просечни температури: „Многу е веројатно дека 2027 година ќе ја замени 2024 како најтоплата година досега“.

Порано овој месец, Организацијата за храна и земјоделство на ОН предупреди дека Ел Нињо може да загрози десетици милиони луѓе во земјите изложени на ризик, предизвикувајќи штети во земјоделието и несигурност во снабдувањето со храна.

Фото: прес-материјал од настанот