Shërbimi meteorologjik britanik: 2027 pritet të jetë viti më i nxehtë deri tani
El Niño i fortë në Paqësor, i përforcuar nga ngrohja njerëzore, mund të shtyjë temperaturat globale në rekorde të reja.
Shërbimi meteorologjik i Mbretërisë së Bashkuar paralajmëroi se fenomeni El Niño, që po zhvillohet mbi Oqeanin Paqësor, mund të jetë jashtëzakonisht i fortë dhe, së bashku me ngrohjen klimatike të shkaktuar nga njeriu, të bëjë që viti 2027 të jetë më i nxehti deri më sot.
El Niño është një cikël natyror klimatik që shfaqet zakonisht çdo dy deri në shtatë vjet dhe zgjat rreth një vit. Sidoqoftë, matjet aktuale tregojnë se temperaturat e sipërfaqes së detit në rajonin kyç të Paqësorit janë mbi 2°C mbi mesataren shumëvjeçare — shumë mbi pragun prej 0.5°C që përdoret për të shpallur El Niño.
Parashikimet flasin për ngrohje të pazakontë në Paqësorin tropikal
“Duhet të jemi të qartë: ky është një ngjarje e paprecedentë. Nuk kam parë kurrë një sinjal kaq të fortë të El Niño në parashikimet tona,” tha profesori Adam Skeif, kreu i parashikimeve afatgjata në Met Office.
Met Office thotë se ngrohja në Paqësor mund të kalojë 3°C teksa El Niño arrin kulmin; disa grupe klimatike parashikojnë edhe devijime më të mëdha, ndoshta deri në 4°C mbi mesataren shumëvjeçare.
“Nëse ndodh kjo, nuk është e pamundur të shohim El Niño-n më të fortë në 500, madje edhe 1.000 vitet e fundit,” tha Nik Hausfader, klimatolog në organizatën kërkimore amerikane Berkeley Earth. Dr Nik Danston, klimatolog në Met Office, vuri në dukje se zhvillimi mund të rrisë mesataren globale të temperaturave: “Është shumë e mundshme që 2027 të zëvendësojë 2024-n si viti më i nxehtë deri tani.”
Më herët këtë muaj, Organizata për Ushqim dhe Bujqësi e OKB-së paralajmëroi se El Niño mund t'i rrezikojë dhjetëra miliona njerëz në vendet e cenueshme, duke dëmtuar bujqësinë dhe duke shkaktuar pasiguri në furnizimin me ushqim.
Foto: material shtypi nga ngjarja
