Буњаковец се претвори во градежен простор, родители загрижени за безбедноста на учениците

Објавено во: Македонија 27 Август, 2026 14:27. Бран на градежни активности во населбата Буњаковец во општина Центар ги остави улиците и тротоарите раскопани; родителите изразуваат загриженост за учениците кои на 1 септември треба да почнат училиште во ОУ „Јохан Хајнрих Песталоци“.

Родителите предупредуваат дека патеките до училиштето не се безбедни

Жителите опишуваат тешка градежна механизација на повеќе локации и интензивна изградба која, според нив, во тој дел од Центар практично ги претвора куќите во згради. Како резултат, сообраќајните ленти и тротоарите стануваат толку тесни што возила и пешаци се принудени да поминуваат на ризични места.

Во групи и меѓу соседи се објавуваат фотографии од раскопани тротоари, градежен материјал и опрема што го блокираат патот за пешачење. Особено загрижувачко е тоа што околу училиштето нема одбележани пешачки премини, што, велат родителите, го прави патот за децата опасен.

„Треба сите што живееме тука да се приклучиме на Вашата страна и да бидеме погласни . Скоро 15 години живеам тука и никогаш овој дел од Центар не бил толку валкан и запуштен .

Ќе ви пратам неколку слики од улицата 29 Ноември , во потегот од Католичка до кафичот Белиер. Улицата е во очајна состојба , а исто и тотоарите од трите градилишта , не е воопшто безбедно да се движиш пешки од големите дупки и блокирани тротоари од градежен материјал.

Ви ја праќам пораката бидејќи се ближи 1 септември, не знам како децата ќе одат до Песталоци по овие тротоари. Плус не се ни одбележани пешачки премини на ниедна улица околу училиштето“, реагира граѓанка во групата „Во одбрана на Буњаковец“.

Родителите од населбата велат дека очекуваат општината и изведувачите да преземат итни мерки: да ги расчистат пешачките правци, да обезбедат оградување на отворените ископи и да постават одбележани пешачки премини пред почетокот на училишната година. До објавувањето на овој текст нема објавено јавно време за отстранување на проблемите.

Фото: METOKARA / Wikimedia Commons (CC BY-SA 3.0)