Почетна
Балкан

Цанов објави нови пораки од Ива Михаилова

Цанов тврди дека Михаилова неколку минути по првата снимка побарала да ја повлече; ДАНС ги негира обвинувањата и потеклото на снимките е непотврдено.

·Балкан
Цанов објави нови пораки од Ива Михаилова

Бугарскиот јутјубер Станислав Цанов објави ново видео со пораки и делови од разговори со Ива Михаилова и со жена која ја претставува како нејзина мајка, тврдејќи дека тоа ја дополнува првичната снимка во која таа зборува за наводни притисоци од Државната агенција за национална безбедност (ДАНС).

Според Цанов, неколку минути по објавувањето на првото видео во кое Михаилова зборуваше за наводен притисок од ДАНС, таа му побарала да ја повлече снимката бидејќи се плаши за себе и за родителите. Следното утро на Фејсбук таа напиша: "Сакам да нагласам дека никој во Бугарија не ме принудувал да правам што било. Тука добив помош, грижа и поддршка."

Претходно избришани пораки и предупредување од мајката

Во новото видео Цанов ги пренесува и приватните пораки кои, според него, ѝ ги испратила Михаилова: "Јави ми се веднаш. Крени ми, зашто сите ќе умреме уште вечерва." Тој вели дека таа во пораките го изразила стравот за сопствената и за безбедноста на родителите. Потоа, пораките биле избришани, но Цанов тврди дека претходно направил видеоснимка од преписката.

Цанов објавува и дел од телефонски разговор со жена која ја именува како мајка на Ива. Во снимката таа бара службите да не се спомнуваат: "Тоа ми е единствениот услов", вели жената и додава дека во спротивно "ќе ме ликвидираат." Цанов вели дека е подготвен да ги даде целосните снимки на проверка и дека материјалот според него трае повеќе од два часа.

Во првото видео, објавено на 14 ноември, Цанов емитуваше делови од тајно снимена средба во која Михаилова објаснува зошто морала да го откаже претходно договореното интервју: според нејзините зборови, ДАНС ѝ кажале дека прво треба да гостува кај новинарот Мартин Карбовски и дека може да ѝ ги зададат прашањата. Ако настапела кај друг, ќе останела без помошта за рехабилитација и за адвокати. Подоцна таа гостуваше кај Карбовски.

ДАНС исто така ги отфрли обвинувањата, соопштувајќи дека нејзини службеници не вршеле притисок и дека потеклото и автентичноста на снимките се непотврдени. Карбовски пак негира дека е агент на ДАНС.

Михаилова побегна во Бугарија и ѝ се суди во отсуство во Основниот суд во Кочани за сообраќајната несреќа на патот Штип–Кочани во која загина 33-годишниот Бесим Дурмиши. На 9 ноември судот ѝ го одби барањето да учествува преку видеоврска. Таа исто така се појави на БНТ и побара да учествува на судењето преку видеолинк, но судот одби.

Фото: Принтскрин од видео објавено од бугарскиот јутјубер Станисла

Поврзани написи