Четворица приведени во врска со двете убиства во Ѓорче Петров, побаран краткотраен притвор

Четири лица се приведени во врска со двете убиства на повозрасни лица во општината Ѓорче Петров, соопшти Министерството за внатрешни работи.

МВР ги наведува осомничените само по иницијали и возраст: А. С. (22), Х. Е. (20), К. А. (58) од Скопје и М. Р. (26) од Струмица. Тие се сомничат за делото разбојништво со последица смрт.

„Во координација и по издадени наредби од ОЈО Скопје, а со цел комплетирање на целокупниот доказен материјал за понатамошна постапка, за лицата е побаран краткотраен притвор согласно член 170 вв член 165 од Законот за кривична постапка, по што ќе биде поднесена соодветна кривична пријава“, соопштија од МВР.

Приведувањата се поврзани со два случаи на пронајдени починати лица со траги на насилство во рок од пет дена во Ѓорче Петров. Во првиот случај, на 22 октомври, беше пронајден мртов 62-годишен маж во неговиот дом, при што лекарот констатирал траги на насилство. Подоцна Министерството соопшти дека е пријавена смрт на 76-годишна жена, исто така во нејзиниот дом, каде имало видливи траги од насилство.

Како што велат надлежните, барањето за краткотраен притвор и приведувањата се дел од активностите за комплетирање на доказите пред да се поднесат формални обвиненија. Следната фаза од постапката ќе ја води Јавното обвинителство Скопје.

Фото: прес-материјал од настанот