Црна Гора затвори уште три поглавја – преговорите со ЕУ сака да ги заврши до крајот на годинава

Црна Гора затвори уште три поглавја од преговорите за пристапување во Европската унија, со што вкупниот број на затворени поглавја се искачи на 21. На меѓувладината конференција беа затворени поглавјата за економска и монетарна политика, статистика и за социјална политика и вработување.

Брисел повикува на брзи реформи додека се зголемува позитивниот импулс

Премиерот Милојко Спајиќ на прес-конференција изјави дека со затворањето на трите поглавја е создадена јасна рамка за економска и монетарна стабилност и дека тоа ќе ја подобри заштитата на граѓаните и можностите на пазарот на труд.

„Имаме подобра заштита на граѓаните и правата, подобри услови за работа, поголеми можности за вработување и социјална инклузија“, рече Спајиќ.

Комесарката за проширување на Европската комисија, Марта Кос, изјави дека ЕУ целосно ја поддржува амбицијата на Црна Гора да ги заврши преговорите за пристапување до крајот на оваа година и дека преостанатите реформи, особено поврзани со владеењето на правото и уставните измени, не може да чекаат.

Ирскиот министер за европски прашања и одбрана Томас Берн истакна дека напредокот на Црна Гора покажува дека проширувањето на ЕУ е возможно и посочи дека усвојувањето на заклучоците поврзани со финансискиот пакет за пристапување е уште една пресвртница. „Денес испраќаме јасна порака – ЕУ го подготвува теренот за пристапување на својата следна земја-членка. Усвојувањето на овие заклучоци во врска со финансискиот пакет за пристапување на Црна Гора во ЕУ беше исто така уште една важна пресвртница во процесот на пристапување. До крајот на месецот очекуваме да го потврдиме позитивниот моментум во врска со кандидатурата на Црна Гора“, рече Берн.

На новинарско прашање за отворените прашања со Хрватска, Спајиќ одговори дека без Хрватска немаше да ги затворат овие три поглавја.

Фото: прес-материјал од настанот