Mali i Zi mbylli edhe tri kapituj – negociatat me BE-në synon t’i përfundojë deri në fund të vitit

Mali i Zi mbylli edhe tre kapituj të tjera të negociatave për anëtarësim në Bashkimin Europian, duke e ngritur në 21 numrin total të kapitujve të mbyllur. Në konferencën ndërqeveritare u mbyllën kapitujt për Politikën Ekonomike dhe Monetare, Statistikë dhe Politikë Sociale dhe Punësim.

Zyrtarët e BE-së kërkojnë reforma të shpejta ndërsa rritet momentumi

Kryeministri Milojko Spajiç tha në një konferencë për shtyp se mbyllja e kapitujve krijon një kornizë më të qartë për stabilitet ekonomik dhe monetar dhe se do të përmirësojë mbrojtjen e qytetarëve dhe mundësitë në tregun e punës.

"Kemi mbrojtje më të mirë të qytetarëve dhe të të drejtave, kushte më të mira të punës, më shumë mundësi për punësim dhe përfshirje sociale," tha Spajiç.

Komisionerja për Zgjerim e Komisionit Europian, Marta Kos, shprehu mbështetjen e plotë të BE-së për ambicien e Malit të Zi që t'i përfundojë negociatat deri në fund të këtij viti dhe bëri thirrje për veprim të shpejtë për reformat e mbetura, veçanërisht ato të lidhura me sundimin e ligjit dhe ndryshimet kushtetuese.

Ministri irlandez për Çështjet Evropiane dhe Mbrojtjen, Thomas Bern, theksoi se progresi i Malit të Zi tregon se zgjerimi i BE-së është i mundur dhe se miratimi i përfundimeve lidhur me paketën financiare për anëtarësimin ishte një tjetër moment kyç. "Sot dërgojmë një mesazh të qartë – BE po përgatit terrenin për anëtarësimin e shtetit të saj të ardhshëm anëtar. Miratimi i këtyre përfundimeve lidhur me paketën financiare për anëtarësimin e Malit të Zi në BE ishte gjithashtu një kthesë e rëndësishme në procesin e anëtarësimit. Deri në fund të muajit presim të konfirmojmë momentumin pozitiv rreth kandidaturës së Malit të Zi," tha Bern.

Duke iu përgjigjur pyetjes për çështjet e hapura me Kroacinë, Spajiç tha se pa Kroacinë ata nuk do të kishin mbyllur këto tre kapituj.

Foto: material shtypi nga ngjarja