Демонстранти во Њујорк фрлаа јајца кон Еди Рама; тој порача „Нема да ме запрат“

На видеа споделени на социјалните мрежи се гледа како неколку лица фрлаат јајца кон Еди Рама додека упатуваат погрдни навреди како „мафијаш“ и „криминалец“. Инцидентот се случи во Њујорк, за време на учество на Рама на седницата на Генералното собрание на Обединетите нации.

За време на инцидентот, Рама беше придружуван од својата сопруга Линда Рама и од шефот на пратеничката група на Социјалистичката партија, Таулант Бала.

Реакција на социјалната мрежа X

Реагирајќи на случката, Рама на социјалната мрежа X напиша дека нема да го запрат оние кои се покриваат со националното знаме и хистерично трчаат по улиците. Тој додаде:

„На оние што се покриваат со националното знаме и хистерично трчаат по улиците  им велам само дека јас го кренав тоа знаме повисоко од кога било претходно во очите на светот. А на оние што мислат дека ќе ме запрат со кал и јајца во мојата мисија да го однесам нашето знаме на врвот на обединета Европа, им велам дека ако за првпат во историјата на албанската држава имаме институционален систем што покажува способност за самопрочистување, тогаш тоа е големо достигнување што не паднало од небо, туку дошло токму како еден од историските резултати на оваа мисија“.

Тој додаде дека Албанија е земја која Европската унија и САД ја ценат поради борбата против корупцијата.

Фото: Matti Blume / Wikimedia Commons (CC BY-SA 4.0)