Директорот на Инфективна: Зголемен број хоспитализации, но не поради водата

Директорот на Инфективната клиника, д-р Фадил Цана, изјави дека нема податоци дека последните гастроинтестинални тегоби кај пациенти се предизвикани од пиење вода од Скопје. Тој предупреди дека од вчера вечерта во приватни пораки на социјалните мрежи се шират неточни информации за причините за хоспитализациите.

Според Цана, клиниката регистрира повисок број на приеми, но тоа го објаснува со актуелните горештини и, како што нагласи, зголемувањето е во рамките на очекуваното и не е над просекот во споредба со претходните години.

"-Тоа што можам јас да го кажам, како директор на Инфективната клиника, е дека на клиниката немаме такви податоци дека причина за некое гастроинтестинално нарушување кај пријавени пациенти е водата. Тоа по дијагностичка постапка мора да биде пријавено. Засега има нормално зголемен број, со оглед на горештиниве. Бројот е зголемен, но, не е над нормалата во споредба со претходните години, тука е во очекуваниот раст. Така што, немаме податоци дека некој има гастроинтестинални тегоби поради водата, поради пиење на вода, рече тој."

Директорот појасни дека утврдувањето на водата како причина бара дијагностичка потврда и формална пријава, што досега не е евидентирано на клиниката.

Медицинскиот персонал продолжува со третман и следење на бројките, а според Цана засега сликата укажува на сезонско зголемување, а не на настан заради контаминација на водата.

Искуството со распрестранувањето на непроверени информации преку социјалните мрежи ја поттикна и потребата за појаснување од здравствената институција за да се смири јавноста.

Фото: Скриншот