Дизелот поскапува на 99 денари, Собранието ја продолжи кризната состојба за шест месеци

Од полноќ литарот дизел поскапе за два денара и ќе чини 99 денари, додека бензините поевтија за 2,5 денари: 95‑ката се продава за 96 денари, а 98‑ката за 98 денари по литар.

Денеска Собранието едногласно, без расправа, ја продолжи кризната состојба за снабдувањето со нафта и нафтени деривати за уште шест месеци. Образложението од Владата е дека ризиците од нарушување на снабдувањето сè уште не се надминати.

Премиерот најави продолжување на даночната мерка

Премиерот Христијан Мицкоски очекува снабдувањето да се одвива без поголеми потреси и следната година и вели дека за годинава потребните количини гориво се обезбедени. Тој ги бранеше домашните цени со тврдењето дека се "најниски во Европа" и најави продолжување на мерката со која ДДВ‑то за дизелот е намалено од 18 на 10 проценти. Покрај даночните мерки, најави и можност за дополнително олеснување за возачите.

Според премиерот, потрошувачката на дизел во пограничните места е двојно зголемена, бидејќи поради пониските цени гориво во земјава точат и граѓани од соседните држави.

Мицкоски најави и дека цената на струјата ќе остане непроменета до крајот на годинава.

Фото: прес-материјал од настанот