Додека викав за помош, ми рекоа дека ќе ме приведат — сведоштва на судењето за „Пулс“

На судењето кое формално беше почнато од почеток поради промена на двајца поротници, сведоци опишаа паника, турканици и обиди за спасување — но и полициско однесување за кое семејствата бараат одговори. Тринаесет полицајци и началници се обвинети за тешки дела против општата сигурност во кобната ноќ во „Пулс“ во која загинаа 63 лица, а беа повредени над 200.

Сведоштва за одбивање помош и закани

На судењето сведокот од Кочани, Николче Ефремов, раскажа дека отишол надвор, го префрлил својот другар до болница и се вратил во „Пулс“, каде имало многу луѓе и тој бил збунет и не знаел што да прави. „Потоа дојдоа и пожарникари да гаснат. Јас и мојот другар Бојан влеговме внатре во тоалетот. Таму беше другарот Давид. Едвај дишеше. Надвор имаше полицаец, не знам кој беше го прашав дали може да ми помогне. Ми кажа тоа не е негова работа. Имаше и други деца, помагавме, ги качувавме во кола повредените и ги носевме. Некои беа свесни некои беа во безсознание“, рече Ефремов.

Тој опиша и дека му ставиле дуксер на глава, бил притиснат од ѕид од гипс картон кој се урнал, а кога се ослободил се заглавил на надворешната врата и бил извлечен за рака. Ефремов рече и дека слушнал од другари дека пред да избувне пожарот полицаец стоел меѓу двете врати и најверојатно не бил во униформа.

Студентката Тијана Коцева, која беше спасена од пожарникарите, рече дека надвор почнала да го бара татко ѝ и да вика силно. „Кога излегов надвор почнав да го барам татко ми и да викам. Викав силно и хистерично. Кога продолжив да викам, еден од униформираните лица ми рече ако продолжам да викам дека ќе бидам приведена“, рече Коцева.

Средношколка која исто така беше меѓу присутните раскажа дека го изгубила сознанието, како снемувала воздух и била затрупана, а потоа била спасена. Таа забележала полицаец во ходникот, а, како што сведочат, потоа од ДНК рекле „да ги поздравиме полицајците“.

Родителите кои ги загубија своите деца велат дека нема да го остават незабележано сведочењето според кое полицаец одбил да помогне. „Ако ова е потврдено преку доказна постапка, тогаш станува збор за постапување кое мора сериозно да се разгледа. Во тие моменти, МВР немало време за изговори и префрлување одговорност. Имало повредени луѓе кои се бореле за живот“, рече Александар Наунов.

Судењето продолжи во фаза со сведоци откако судот ги разгледа досегашните изјави. Предметот се однесува на пожарот во „Пулс“ во кој животот го загубија 63 лица, а над 200 беа повредени.

Фото: прес-материјал од настанот