Досега 65 случаи на западнонилска треска во земјата, најмногу од Скопје

Заклучно со 15 септември 2026 година, во Северна Македонија се регистрирани вкупно 65 случаи на западнонилска треска, соопшти Институтот за јавно здравје. Од нив, 60 се водат како потврдени, а пет како веројатни.

Според податоците за место на живеење, 60 случаи се пријавени од Скопје, два од Велес и по еден од Куманово, Свети Николе и Кавадарци.

Во извештајот се наведува дека 64 случаи се автохтони, а еден пациент имал историја на патување во Грција, но инкубацискиот период опфатил и престој во земјата.

„Од регистрираните случаи, 51 или 78,5% се машки, а 14 или 21,5% се женски“, стои во извештајот.

Невроинвазивната форма на болеста е застапена кај 63 пациенти и сите биле хоспитализирани — 61 во Универзитетската клиника за инфективни болести и фебрилни состојби, и по еден во Аџибадем Систина и Клиника Жан Митрев. Досега се потврдени осум смртни случаи поврзани со невроинвазивната болест.

Тренд и препораки

Податоците укажуваат на зголемен број пријави во јули и август 2026 година, со изразена просторна концентрација во скопскиот регион. Најмногу случаи се пријавени во општина Кисела Вода, особено во населбата Драчево, како и во општина Гази Баба.

Во извештајот се порачува: „Епидемиолошкиот надзор на болеста, систематското и рано спроведување на програми за контрола на комарци и мерките за лична заштита од каснувања од комарци се сметаат за најсоодветни мерки за контрола на западнонилската треска. Бидејќи циркулацијата на вирусот и неговата географска дистрибуција не можат да се предвидат, се охрабруваат мерки за лична заштита од комарци, во текот на периодот на активност на комарците.“

Во однос на учениците, Клековски истакна: "Учениците не се ризична група за западнонилска треска, не беа потребни посебни мерки".

Фото: Pexels