Драматичен пресврт: циклон носи оркански ветрови и прв снег на планините на 13 ноември

Силен атлантски циклон се приближува од запад и ќе го зафати Балканот, донесувајќи прво силни ветрови и обилни врнежи, а веднаш потоа и нагол пад на температурите кој ќе ги претвори есенските денови во речиси зимски.

Најтешко на 12 ноември, снег од 13 ноември на планините

Регионалните метеоролошки служби издадоа итни предупредувања: најкритичниот бран се очекува в четврток, на 12 ноември, кога циклонот ќе донесе обилни дождови и разорни ветрови. На поединечни локации релативно брзо може да наврнат над 100 литри дожд на метар квадратен, што отвора директна опасност од поплавувања, проблеми во сообраќајот и материјална штета на инфраструктурата.

Нашиот познат метеоролог Славчо Попоски упати апел до граѓаните и предупреди дека в четврток (12 ноември) на многу места ширум Балканот циклонот ќе донесе обилни дождови и оркански ветрови со брзина од над 110 км/час, особено долж Јадранското приморје, во Босна и Херцеговина, во Црна Гора и на северот од Албанија.

Веднаш по првиот бурен бран следи продор на многу поладен воздух од север, што ќе предизвика драстичен термички шок: температурите ќе паднат во рок од неколку часови и есенските услови може брзо да преминат во зимски.

Попоски ги опиша очекуваните промени: „Поради продор на многу поладен воздух од север, на ден петок (13 ноември) во попладневните и во вечерните часови во Словенија, Хрватска, Босна и Херцеговина, Србија и Црна Гора температурите нагло ќе се спуштат и за 15 до 20 степени. На планинските места над 1000 метри надморска височина ќе има пообилни врнежи од снег со формирање снежна покривка од 15 до 20 сантиметри, а не се исклучува можноста снежната граница да се спушти и во пониските населени места.“

Во текот на викендот, во поголем дел од регионот температурите ќе бидат близу, а на места и под нулата, што ќе доведе до појава на мраз. Регионалните прогнози укажуваат дека првиот значаен снег на повисоките планини во Србија и Босна и Херцеговина — Копаоник, Златибор, Јахорина и Бјелашница — е реална можност веќе в петок, на 13 ноември, со очекувана формација на снежна покривка од 15 до 20 сантиметри; слична состојба се предвидува и за планинските предели во Македонија.

Фото: прес-материјал од настанот