ДУИ го парализира Собранието: Законите за високо образование жртва на битката за Бадентер

Блокада на клучните реформи

Политичката битка за превласт и легитимитет меѓу албанските партии целосно го парализираше донесувањето на законите за кои е потребно Бадентерово мнозинство. Покрај Законот за правична застапеност, во собраниските лавиринти останаа заглавени и клучните пакет-закони за високо образование. Според моменталната ситуација, овие законски решенија нема да ја видат светлината на денот пред летните одмори, а нивната судбина останува неизвесна дури и до крајот на мандатот на овој парламентарен состав, доколку власта не успее да обезбеди поддршка од опозициските пратеници од немнозинските заедници.

Опозициските партии на Албанците ја користат оваа ситуација како политичко оружје. Преку континуираната блокада на законите кои бараат двојно мнозинство, тие се обидуваат да докажат дека вистинскиот легитимитет за претставување на Албанците лежи кај нив, а не кај коалицијата Вреди.

Математиките на власта не излегуваат

Владејачкото мнозинство отворено признава дека во моментов не располага со потребното Бадентерово мнозинство, но тврди дека интензивно работи на привлекување нови пратеници. Иако премиерот Христијан Мицкоски неодамна најави приклучување на Демократската партија на Турците (ДПТ) кон мнозинството, со што пратеникот Бејџан Илјас се вбројува во нивниот табор, математиката сè уште не е на нивна страна. Дури и со најавената номинација на Зулфиќар Зејнула за министер, власта контролира само околу 15 од вкупно 39 пратеници кои гласаат по Бадентеровиот принцип.

Оваа слабост вешто ја користи албанската опозиција. Обидите на власта да маневрира преку одложување на гласањето за Законот за правична застапеност и презакажување на законите за високо образование од 111-тата на 115-тата седница беа спречени. ДУИ, Алијанса за Албанците и Албанската лига успешно ги блокираа овие потези користејќи процедурални забелешки.

Тензии и вербални пресметки во комисиите

Политичкото надмудрување се прелеа и во собраниските комисии, предизвикувајќи сериозни тензии. Расправата на Комисијата за образование се најде на раб на инцидент, откако претседателката Иванка Василевска ја прекина седницата поради наводна лична навреда од пратеникот Сали Мурати од Европскиот фронт.

„Пратениците ништо не знаат што пишува во законите. Наместо три дена, ни дадовте еден час за да ги разгледаме материјалите. Ова е деловнички апсурд. И повторно нема образложение за итноста на постапката“, истакна Мурати во своето обраќање.

Ова предизвика бурна реакција кај Василевска, која го обвини Мурати за непочитување и обид да ја сведе на „техничка секретарка“. Мурати, од своја страна, обвини за серија прекршувања на Деловникот, посочувајќи дека на 111-тата седница биле направени дури шест повреди, вклучително и одбивањето на претседателот на Собранието, Африм Гаши, да стави на гласање закони иако имало кворум.

По кратката пауза и смирувањето на страстите, двајцата пратеници си упатија извинување. Сепак, Мурати најави можност за преиспитување на уставноста на постапките и информирање на дипломатските претставништва за случувањата во законодавниот дом.