ДУИ: Кој ќе понесе одговорност за загубениот ИПА‑грант од 60,77 милиони евра за пругата кон Бугарија?

ДУИ денеска предупреди дека државата ја загубила ИПА‑помошта од Европската Унија во износ од 60,77 милиони евра, наменета за изградба на третата делница од железничкиот Коридор 8 кон Бугарија, и побара од Владата да објасни кој ќе ја преземе одговорноста за ова.

Според партијата, овие средства веќе не се достапни оти тендерот објавен во 2024 година беше поништен, а договорот за градба не е склучен во определениот рок — податоци кои, како што велат, се содржани во документи кои Владата ѝ ги доставила на Собранието.

„Значи, губењето на 60,77 милиони евра не е политичко тврдење. Тоа е последица документирана во официјалните акти на институциите. Граѓаните треба да знаат дека на крајот на 2023 година, кога ДУИ беше дел од власта, беше обезбеден најголемиот финансиски пакет за овој проект, во вредност од околу 560 милиони евра: 175 милиони евра кредит од Европската инвестициска банка; 175 милиони евра кредит од ЕБОР; 149 милиони евра грант од WBIF; 60,77 милиони евра ИПА‑грант од Европската Унија. Ова беше резултат на довербата на европските партнери и на работата за поставување на Коридорот 8 како стратешки приоритет на државата“, велат од ДУИ.

Прашање на одговорност и стратешки интерес

ДУИ истакнува дека навремено предупредиле оти Владата нема да го третира Коридорот 8 како приоритет и дека одложувањата и промена на приоритетите ќе имаат последици. Партијата нагласи дека проектот не е само инфраструктурна инвестиција — Коридорот 8 е паневропски коридор кој ја поврзува Јадранското со Црното Море, е дел од стратешката транспортна мрежа на ЕУ и има посебно значење за НАТО.

„Кажавме дека одложувањето на проектот и промената на приоритетите ќе донесат последици. Денес, за жал, граѓаните се соочуваат со резултатот – губење на европски средства. Коридорот 8 не е само инфраструктурен проект. Тој е паневропски коридор, дел од стратешката транспортна мрежа на Европската Унија и има особено значење за НАТО. Го поврзува Јадранското со Црното Море, ја зајакнува регионалната безбедност и создава нови економски можности за нашата држава“, додаваат од ДУИ.

Во соопштението, ДУИ искажа сомнежи во начинот на кој Владата ги водела постапките и побара јасни одговори: „Одложувањето на Коридорот 8 и губењето на европските средства создаваат впечаток дека проектите од значење за НАТО и Европската Унија се ставаат во втор план. Денес бараме јасни одговори: Кој ќе понесе одговорност за губењето на 60,77 милиони евра? Зошто не беа исполнети роковите за реализација на проектот? Дали сега граѓаните ќе треба од државниот буџет да го покриваат она што Европската Унија беше подготвена да го финансира како грант?“

Партијата најави дека ќе продолжи да ја брани евроатлантската ориентација и реализацијата на Коридорот 8, нагласувајќи дека проектот е стратешки интерес на државата и граѓаните, а не сопственост на која било политичка партија.

Фото: прес-материјал од настанот