Двајца лекари обвинети за убиство по смртта на Јоргос Мазонакис

Двајца лекари од приватна ординација во Атина се обвинети за убиство со евентуална умисла по смртта на популарниот пејач Јоргос Мазонакис, кој почина за време на, според истрагата, нелегална медицинска терапија минатата недела.

За двајцата доктори, кои беа уапсени во четвртокот, првично беше поднесена постапка за „изложување на опасност со смртен исход“, но истрагата открила дополнителни докази и обвинението сега е променето и против нив е поднесено обвинение за убиство со евентуална умисла.

Што покажа истрагата

Надлежните наведуваат дека Мазонакис, на возраст од 54 години, починал од срцев удар додека медицинска процедура била во тек, што е во спротивност со првичните тврдења на лекарите дека третманот не бил започнат. Според објавените информации, пејачот умрел околу еден час пред да биде информирана и повикана брзата помош.

Истражителите посочуваат дека уредот користен за третманот, означен во извештаите како (herapeutic plasma exchange), веројатно го снимил целокупниот процес, вклучително и моментот кога срцето престанало да работи. Ординацијата е регистрирана како обична приватна ординација по интерна медицина, но се сомневаат дека нелегално изведувала терапии со матични клетки и сепарација на плазма.

Ординацијата е во сопственост на брачен пар лекари: општ лекар и неговата сопруга, наводно гинеколог и магистер по молекуларна и развојна биологија, која ја изведувала сепарацијата на плазмата кога настапила смртта. Двајцата ќе бидат изведени пред јавен обвинител и истражен судија утре наутро.

Мазонакис денеска беше погребан на гробиштата во населбата Никеа во западниот дел на Атина. Телото беше изложено во црквата од вчера вечер, а пред погребот се служеше литургија. Роден во 1972 година, кариерата ја започнал во раните 90-ти, имал над тридецениска кариера со над десет албуми и илјадници настапи, и требаше да одржи концерт на 20 септември по повод 33 години на сцената.

Фото: прес-материјал од настанот