Двајца осомничени за манипулации со е‑индекс на Универзитетот „Гоце Делчев“ во Штип добија осум дена притвор

Судија на претходна постапка од Основниот суд во Штип му одреди осум дена притвор на 44‑годишниот Р.Т. и на 44‑годишната М.М.Н., осомничени за манипулации со електронските индекси на Универзитетот „Гоце Делчев“ во Штип.

Судот го прифати предлогот на Основното јавно обвинителство за притвор за раководителот на е‑индексот Р.Т. и за М.М.Н., вработена како советник во студентската архива. Двајцата се сомничат за компјутерска измама и злоупотреба на службената положба.

Обвинителството ја проценува противправната корист

Обвинителството ја проценува противправната имотна корист од манипулациите на околу 21.000 евра. Според истрагата, сомнителните активности се одвивале пет години, во периодот од 2021 до 2026 година.

Полицијата соопшти дека раководителот на е‑индексот подолг период примал пари од студенти од Турција за да им овозможува пријавување и полагање испити по истекот на роковите. Осомничен е и дека бришел оценки и кредити од електронските индекси за студентите да можат да запишат нов семестар или година, како и дека внесувал податоци за наводно платена школарина.

При претрес во домот на Р.Т. биле одземени три лаптопи, четири мобилни телефони, УСБ‑мемории, документација и пари, а со судска наредба бил пребаран и електронскиот систем на универзитетот каде што истражителите пронашле податоци за направените промени.

„Но, при тоа пронајдени се записи и за извршени промени во системот и од страна на 44-годишната М.М.Н., вработена како советник на студентската архива, и кај неа е извршен претрес на домот по дополнително издадена судска наредба, по што е лишена од слобода“, соопштија од МВР.

Фото: прес-материјал од настанот