Двајца вработени во МВР фатени при изработка на лажна возачка дозвола за 1.400 евра

Надреден и подредена вработени во Министерството за внатрешни работи беа фатени ин флагранти додека изработувале лажна возачка дозвола за човек кој платил 1.400 евра, што отвори обемна истрага во внатрешната контрола на МВР, тврдат извори запознаени со случајот.

Методот и серијата сомнежи

Според првичните сознанија, лицето било упатено да пријави дека ја изгубило својата дозвола. При издавањето на новата дозвола, службениците, наводно, планирале да му допишат повисоки категории од онаа што претходно ја поседувал — да може, освен автомобил, да управува и со шлепер и со автобус.

Ако истрагата ги потврди овие сомнежи, според експертите, тоа би претставувало сериозен скандал за јавната безбедност: возачите на автобуси превезуваат деца на екскурзии, носат патници и туристи, и одговорноста за нивните дозволи е клучна за безбедноста на патот. Постојат неприкосновени услови за да стане некој возач на автобус — важечко лекарско уверение, и да поседува возачка дозвола за камион најмалку 2 години, меѓу другото.

„Во врска со случајот за кој прашувате ве известуваме дека од страна на Одделот за внатрешна контрола криминалистички истраги и професионални стандарди при МВР известено е надлежното Основно јавно обвинителство и во координација со обвинителството се преземаат соодветни активности за расчистување на случајот, по што јавноста ќе биде соодветно известена“, велат од МВР.

Извори високо позиционирани во Министерството потврдуваат дека дел од лицата под истрага во минатото биле поврзувани со аферата за лажни пасоши од 2021 година — скандал во кој беа издадени македонски пасоши со украдени и лажни идентитети на 215 белосветски криминалци. Исто така, медиумските написи од вчера наведуваат дека околу 300 возачки дозволи можеле да бидат подигнати или фалсификувани на ваков начин.

Случајот наликува и на кривичната постапка од 2021 година кога 18 вработени во управни служби на МВР беа осудени за издавање дозволи на лица што никогаш не полагале возачки испит. Од внатрешната контрола и од јавниот обвинител се најавени координирани активности; дополнителни информации ќе бидат соопштени по напредокот на истрагата.

Фото: Слободен печат - Драган Митрески