Двајца загинаа во голем пожар на островот Саламина

Двајца починаа додека пожарникарите гаснеа голем пожар што зафати делови од грчкиот остров Саламина, кој брзо се прошири поради силниот ветер. Девет лица со изгореници се префрлени во болница, а превентивно беа евакуирани шест населени места.

Како избувна пожарот

Според пријавите, два пожари избија во рок од 15 минути на две различни локации — еден во јужниот, а друг во источниот дел од островот. Безживотните тела беа пронајдени на улица во близина на местото каде што започнал еден од пожарите.

Во гаснењето се вклучени 192 пожарникари организирани во десет пешадиски тимови, со 48 возила. Покрај нив помагаат и доброволци и општински цистерни.

Од воздух интервенираат периодично шест авиони и осум хеликоптери, а еден од хеликоптерите е ангажиран специфично за координација на акцијата.

Од бројот 112 беа испратени вкупно шест пораки: две за информирање на граѓаните и четири со налог за евакуација.

Евакуациите се извршуваат и по морски пат за оние што биле на плажите, со чамци и пловила на противпожарната служба и крајбрежната служба на Грција; досега 90 лица се пренесени на безбедни локации.

Во поширокиот дел на пожарот се распоредени и шест возила на брзата помош и два мотоциклa за итни интервенции. Островот Саламина, со околу 37.000 жители, е најголем од островите во Саронскиот залив и се наоѓа во непосредна близина на Атина.

Фото: прес-материјал од настанот