ДЗР: слабости во системот за дозволи за изградба на фотоволтаични електроцентрали

Државниот завод за ревизија утврдил дека во периодот од 2022 до мај 2025 година системот за издавање дозволи за изградба на фотоволтаични електроцентрали (ФЕЦ) не обезбедувал целосна законска усогласеност, навремено планирање и координирано постапување на институциите.

Клучни констатации од ревизијата

Ревизорите забележале дека дел од проектите за ФЕЦ биле одобрени без да се почитуваат соодветните законски процедури. Во три конкретни случаи дозволи за објекти со моќност од 19, 174 и 337 MW биле издадени од општини, иако станува збор за градби од државно значење.

Извештајот укажува и на слабости во институционалната координација, надзорот и следењето на реализацијата на обврските на инвеститорите. Исто така се констатирани неусогласени податоци за инсталираната моќност, различен третман на инвеститорите и недоволна интероперабилност меѓу институциите.

Ревизијата нотира дека надзорот од страна на општините над спроведувањето на енергетските прописи практично изостанувал, додека инспекциските контроли на техничката опрема во ФЕЦ биле малубројни, што го отежнувало следењето на брзиот раст на расположивата моќност.

ДЗР посочува дека по измените на Законот за енергетика во мај 2025 година има подобрувања во планирањето, а Годишниот план за изградба на енергетски објекти за 2026 година бил донесен навреме. Сепак, ревизорите предупредуваат дека сè уште не се донесени дел од клучните подзаконски акти, не е формирана комисијата за доделување овластувања за изградба на енергетски објекти, а регистарот на електроцентрали е нецелосен и неусогласен.

Во заклучок, ревизорите препорачуваат зајакнување на надзорот, мониторингот и институционалната координација за растот на ФЕЦ да биде проследен со законито и одржливо управување.

Фото: прес-материјал од настанот