BQE: Lufta në Lindjen e Mesme goditi fuqishëm konsumimin në zonën e euros

Banka Qendrore Evropiane thotë se lufta në Lindjen e Mesme ka goditur fuqishëm shpenzimet e konsumatorëve në zonën e euros dhe se tronditjet e reja gjeopolitike mund të pengojnë përsëri rimëkëmbjen ekonomike.

Rënia e besimit dhe zbutja e rritjes së shpenzimeve

Indeksi i Besimit të Konsumatorit (CCI) midis shkurtit dhe prillit u ul për rreth 12 pikë — një rënie që Banka Qendrore Evropiane e vlerëson gati të barabartë me rënien prej 15 pikësh të regjistruar në dy muajt e parë pas shpërthimit të luftës në Ukrainë.

Rritja vjetore nominale e konsumit të familjeve ngadalësoi nga tre deri në katër për qind, sa ishte në mes të vitit 2024, në rreth 2.5 për qind në prill 2026.

Analiza e bankës tregon se ulja erdhi kryesisht për shkak të shtyrjes së blerjeve jo të domosdoshme. Shpenzimet u ulën më shumë për veshje luksoze, këpucë, pajisje sportive, udhëtime dhe shërbime si rekreacioni.

Familjet me të ardhura më të larta reduktuan më shumë shpenzimet diskrecionare për shkak të rritjes së pasigurisë, ndërsa familjet më të varfra — ku pjesa më e madhe e buxhetit shkon për ushqim dhe banim — kryesisht shkurtojnë blerjet e mallrave të qëndrueshme dhe shpenzimet në restorante dhe kafene. Shpenzimet nominale u rritën vetëm në kategorinë e energjisë, çka reflekton çmimet më të larta të karburantit dhe transportit.

Një rrezik shtesë lidhet me perceptimin e qytetarëve për të ardhurat personale: në anketën e prillit rreth 40 për qind e të anketuarve thanë se nuk presin që pagat ti kompensojnë humbjen e fuqisë blerëse të shkaktuar nga inflacioni lidhur me luftën në Lindjen e Mesme. "Nëse qytetarët arrijnë në përfundimin se afatgjatë do të mund të blejnë më pak, ata mund të vazhdojnë të kursejnë në vend që të shpenzojnë, çka do të ngadalësonte më tej ekonominë e zonës së euros", shton banka në raportin e saj në faqen e internetit.

Foto: material shtypi nga ngjarja