Едина Муса: Мајчинството не ми ги одзеде соништата, туку ми даде нова сила
Поранешна репрезентативка и сегашна тренерка зборува за враќањето по породувањето и повредата, подготовките за шеста операција на коленото и за балансирањето меѓу семејството и спортот.
Едина Муса се врати на теренот не како некоја која ги откажала соништата со доаѓањето на мајчинството, туку како спортистка која во родителството пронашла нова решителност. Поранешна репрезентативка, денес тренер и фитнес инструктор, таа ја спои дисциплината и реалниот пристап за да најде рамнотежа меѓу тренинзите, семејството и рехабилитацијата — дури и пред шеста операција на коленото по повредата од крајот на сезоната.
Повредата ѝ се случи за време на финалниот натпревар помеѓу Струга и Гевгелија, по кој реши да се врати во тимот од Гевгелија и да помогне да се обезбеди пласман во Прва лига жени — мисија што на крајот беше остварена.
Рехабилитација, навики и ментален фокус
Наместо жалење откако ја оперираа, Едина објави видео во кое вежба. Таа вели дека со тоа сака да испрати порака дека предизвиците не го запираат шампионот, туку го мотивираат. Рехабилитацијата, објаснува, е и психолошки предизвик и бара трпение и постепен напредок.
За моментот кога дозна дека ќе стане мајка таа вели: „Искрено, можеби во некој момент сум се запрашала дали повторно ќе можам да спортувам на исто ниво. Но, желбата да имам дете беше преголема и бев подготвена, ако треба, некои работи да ги ставам на пауза.“ Како професионален фитнес инструктор, таа ги советува жените да го слушаат телото за време на бременоста и по породувањето, но и да избегнуваат ограничувачки верувања кои можат да ги блокираат во самите себе.
На прашањето што беше најтешко при враќањето, Муса одговара дека и физички и психички имало предизвици: физички, потребно било време за враќање на формата; психички, тешко било да се прифати дека не може веднаш да ги кревa тежините и да ги прави сите тренинзи кои ги сакаше. Ги опишува и чувствата кога го остава детето, Максим, дома за да оди на тренинг — чувство со кое многу мајки се поистоветуваат.
Клучната поддршка, според неа, била семејната: сопругот, кој исто така е поранешен кошаркар, добро ја разбира нејзината пасија и ѝ беше огромна опора, а помош добила и од родителите. Муса упатува порака до мајките што се плашат дека мајчинството ќе им ги одземе соништата — да не се плашат, да се грижат за себе и да побараат помош кога им треба, бидејќи исполнетата мајка е и подобра мајка за своето дете.
Фото: Приватна архива на Едина Муса