Една година без Владимир „Панчо“ Блажев

Денес, 14 октомври 2026 година, се навршува една година од смртта на Владимир Блажев — Панчо, препознатливиот македонски пејач, музичар, диџеј и еден од основачите на хип‑хоп дуото ДНК. Неговото заминување остави празнина на домашната музичка сцена и повторно го издвои трагичниот настан од кочанскиот клуб „Пулс“.

Глас на генерации

Панчо беше еден од артистите кои повеќе од две децении го обликуваа модерниот урбан звук во Македонија. Заедно со Андреј Ѓорѓиески создадоа песни и албуми кои останаа дел од сеќавањата на цела генерација — од раните хитови „Девојка за везден“ и „Благодарам однапред“ до големите концерти во арените „Метрополис“ и „Борис Трајковски“.

Зад сценскиот лик и енергијата како DJ Shorty P, стоеше човек со тешка животна приказна: пораснал без татко, со несебична поддршка од својата мајка Каќуша, а подоцна сам го создаде семејното гнездо со сопругата Маја и своите синови.

Патот на Панчо се прекина по трагедијата во Кочани на 16 март 2025 година, кога ги загуби музичкиот партнер Андреј и бројни пријатели. По повеќемесечна борба со сериозните повреди, тој почина на 14 октомври 2025 година.

Една порака што порано ја објавил на социјалните мрежи денес добива поразлична тежина. Пуштајќи ја во позадина песната „Ако утре ме нема“, тој порача: „Смртта не е ништо посебно, само сум негде до вас во друга соба. Јас сум јас и вие сè уште сте вие и секогаш ќе останеме тоа што сме биле. Од време на време повикувајте ме, разговарајте со мене баш исто како што сме зборувале секогаш. Немојте да има промена во гласот.

Немојте да жалите. Смејте се баш онака гласно како секогаш кога сме биле заедно и кога сум правел глупости и понекогаш помолете се за мене и мојата душа која талка наоколу.

Немојте да ме заборавите само затоа што не ме гледате, ќе ве чекам тука негде во близина, веднаш позади аголот. Се е во ред, ве гледам и се радувам за секој ваш успех, но и тажам кога тажите и вие“ — напиша тој, додавајќи емотикон со ангел на крајот. Тие зборови повторно ги враќаат сеќавањата и ги исполнуваат плејлистите, потсетувајќи дека неговиот глас продолжува да живее во секој рефрен и ритам.

Фото: прес-материјал од настанот