Ел Нињо може да го намали економското производство за околу 395 милијарди евра до 2027

Многу силниот климатски феномен Ел Нињо би можел до 2027 година да го намали економското производство во 144 земји за околу 395 милијарди евра, покажува нов извештај на осигурителната компанија „Алијанц“.

Најголем дел од економскиот удар би паднал врз Кина, САД и Индија — земји кои заедно чинат речиси 60 отсто од вкупно проценетата штета. Извештајот предупредува дека дополнителните штети од суши, поплави, пожари и урагани би можеле да ја зголемат вкупната сметка.

Како ќе се одрази на Европа

Во Европската Унија потенцијалната загуба на економското производство е проценета на околу 21 милијарда евра, односно 0,09 отсто од БДП. „Алијанц“ проценува дека Ел Нињо би можел да ја зголеми вкупната инфлација во ЕУ за 0,31 процентен поен, додека цените на храната би можеле да бидат повисоки за околу 0,5 процентни поени.

Извештајот подвлекува дека климатските ризици веќе се видливи во макроекономските податоци: екстремните временски услови во 2025 година предизвикале глобални економски загуби од околу 184 милијарди евра — за 32 отсто помалку отколку во 2024 година, но сепак за 20 отсто над просекот во периодот од 2000 до 2019 година.

Загубеното производство во Европа во текот на 2026 година, предизвикано од топлотните бранови, е проценето на 113 милијарди евра. „Алијанц“ оценува дека земјите кои имаат развиени системи за превенција, однапред обезбедено финансирање и јасни механизми за реагирање успеале да ги ограничат економските нарушувања во 2025 и 2026 година.

Според наодите, инвестирањето во прилагодување кон климатските промени, отпорна инфраструктура и системи за рано предупредување би можело да биде поевтино од подоцнежното плаќање на штетите, наведува „Алијанц“ на својата веб-страница.

Фото: прес-материјал од настанот