ЕСР: 3,8% од буџетот на ЕУ биле неправилно потрошени во 2025 година

Европскиот суд на ревизори (ЕСР) утврди дека 3,8 отсто од буџетот на Европската Унија биле неправилно потрошени во 2025 година, стои во годишниот извештај што ревизорите го претставија при презентирањето на наодите.

Ревизорите проценија дека неправилностите поврзани со средствата за економско закрепнување по ковид‑пандемијата изнесуваат 45,4 милијарди евра. До крајот на 2025 година биле исплатени 237,5 милијарди евра од вкупно предвидените 359,9 милијарди евра за тие планови, а само три од 27‑те земји членки искористиле најмалку 80 отсто од средствата. Од 37‑те исплати проверувани во 2025 година, кај девет беа откриени прекршувања на правилата за јавни набавки или неправилности поврзани со државната помош.

Широки грешки во редовните расходи и финансиски ризици

Ревизорите наведуваат дека утврдените грешки во рамките на редовниот буџет се „значителни и широко распространети“, со највисоки стапки кај кохезионата политика (раст од 5,7 отсто во 2024 на 6,6 отсто во 2025) и кај земјоделството и животната средина (раст од 2,6 на 3,9 отсто).

ЕСР посебно предупреди дека вкупниот долг на ЕУ би можел да достигне еден трилион евра до 2027 година, што дополнително ќе создаде притисок врз идните буџети и политички одлуки. Трошоците за камати во периодот 2028–2034 година би можеле да достигнат 93 милијарди евра, а предлозите за следниот долгорочен буџет предвидуваат и нови задолжувања за поддршка на Украина и справување со кризи. Заемот за помош на Украина одобрен од 2014 година изнесува вкупно 170,1 милијарди евра, од кои 70,3 милијарди евра биле исплатени до крајот на 2025 година.

ЕСР појасни дека проценетиот удел на грешки не е показател за ниво на измами или неефикасност, туку ја отсликува количината средства што не биле искористени целосно според правилата на ЕУ. При проверките ревизорите откриле 17 случаи со сомнение за измама, кои биле префрлени на надлежните органи.

Во реакцијата, Европската комисија посочи дека стапката од 3,8 отсто е споредлива со претходната година (3,6 отсто) и е значително пониска споредено со 2023 година (5,6 отсто) и 2022 година (4,2 отсто). Комисијата додава дека повеќето неправилности не се поврзани со измами и дека преку проверки на Комисијата и земјите членки во 2025 година беа спроведени превентивни и корективни мерки во вредност од девет милијарди евра.

Фото: прес-материјал од настанот