ЕУ финансира реконструкција на геријатриско одделение во Домот „Зафир Сајто“ во Куманово
Проектот со Врање има вкупен буџет 402.336 евра, 85% финансирани од ЕУ и ќе трае 24 месеци.
Геријатриското одделение во Домот за стари лица „Зафир Сајто“ во Куманово ќе биде реновирано и опремено со средства обезбедени од Европската унија, во рамки на прекуграничен проект со градот Врање, Република Србија.
Проект и партнери
Проектот „Премостување на границите – заедно за утре“ е партнерска иницијатива меѓу двете институции и две невладини организации, „Порака наша“ од Куманово и Едукативен центар од Лесковац.
Вкупниот буџет на проектот изнесува 402.336 евра, од кои 85 отсто ги обезбедува Европската унија. Со средствата се предвидени реконструкција на Домот за стари лица во Куманово и унапредување на условите во Центарот за унапредување на социјалната заштита во Врање, како и активности за подобрување на квалитетот на животот на корисниците. Проектот ќе трае 24 месеци.
За реконструкцијата и опремувањето на одделението во Домот „Зафир Сајто“ предвидени се близу 100.000 евра. Планирани се адаптација на простории, поправки и набавка на опрема и мебел.
Советот одобри 27 нови вработувања во Домот за стари лица во Куманово, се чека согласност од Министерството за финансии.
Раководството на установата истакнува дека инвестицијата ќе го зголеми стандардот на нега и ќе обезбеди подобри услови за долгорочните корисници, а соработка со колегите од Врање ќе овозможи размена на стручно искуство.
Фото: СДК.МК)
