Bashkimi Evropian dhe Mbretëria e Bashkuar nënshkruan marrëveshje për lëvizje të lirë mes Spanjës dhe Gjibraltarit

Në Bruksel, më 30 korrik 2026, Bashkimi Evropian dhe Mbretëria e Bashkuar nënshkruan një marrëveshje me të cilën hiqen kontrollet kufitare dhe lejohet lëvizja e lirë e njerëzve dhe mallrave midis Spanjës dhe territorit të Gjibraltarit, i cili është nën kontrollin britanik.

Marrëveshjen e nënshkruan komisioneri evropian për tregti Maroš Šefčovič dhe ministri britanik për Evropën, Stephen Doughty, ndërsa pranë ishte edhe kryeministri i Gjibraltarit, Fabian Picardo.

Teksti heq të gjitha barrierat fizike dhe kontrollet e rregullta në kufirin tokësor midis Gjibraltarit dhe Spanjës dhe parashikon hapa për një përputhje më të ngushtë të territorit me zonën Shengen dhe Tregun e Vetëm të BE-së, duke ruajtur qartë sovranitetin britanik mbi Gjibraltarin, në kërkesë të Londrës.

Çfarë do të ndryshojë në terren

Nga nesër në kalimin kufitar midis Gjibraltarit dhe qytetit spanjoll La Línea, që e kalojnë mijëra njerëz çdo ditë, nuk do të ketë më kontrolle të rregullta të dokumenteve, çka do të thjeshtësojë kalimet e përditshme dhe transportin e mallrave.

Gjibraltar është një territor i vogël me një popullsi rreth 40,000 banorësh. Rreth 15,000 punëtorë spanjollë hyjnë në Gjibraltar çdo ditë — një numër që përbën afërsisht gjysmën e fuqisë punëtore të territorit.

Marrëveshja midis Londrës dhe Brukselit u arrit në qershor të vitit të kaluar pas viteve të vështira të negociatave në të cilat mori pjesë edhe Spanja. Kontrollat kufitare u vendosën pas referendumit për Brexit në 2016 dhe pas daljes së Mbretërisë së Bashkuar nga BE-ja. Për nesër është parashikuar një vizitë në Gjibraltar nga kryeministri i Spanjës, Pedro Sánchez. Gjibraltar është nën kontrollin e Mbretërisë së Bashkuar që nga viti 1713, sipas Traktatit të Utrehtit, dhe është një territor i jashtëm britanik në bregun e Spanjës, me pjesët e mbetura të rrethuara nga Deti Mesdhe dhe Oqeani Atlantik.

Foto: material për shtyp nga ngjarja