ЕУ ќе гради седум гигантски компјутерски центри за развој на вештачката интелигенција

Европската Унија на 30 јули 2026 година ја означи почетната фаза на планот за изградба на седум големи компјутерски центри наменети за развој и тренирање на напредни модели за вештачка интелигенција во Европа. Вредноста на проектот е проценета на околу 30 милијарди евра.

Според најавата, Брисел планира да подигне четири помали центри со капацитет меѓу 25.000 и 75.000 чипови и три големи центри со моќност од 40.000 до 100.000 чипови. Центрите би требало да обезбедат пресметувачка инфраструктура за стартапи, научни тимови, мали и средни претпријатија и јавни институции.

„Ова едноставно е најголемото јавно-приватно партнерство кое обезбедува околу 30 милијарди евра за инвестирање. Сега, зошто ѝ е потребно ова на Европа? Бидејќи Европа сака да стане првиот континент на вештачка интелигенција. Овие гигафабрики ќе ја обезбедат неопходната пресметувачка моќ да го направат тоа возможно, бидејќи Европа сака да стане првиот континент на вештачка интелигенција, и бидејќи на нашите стартапи, мали и средни компании, истражувачи и јавни власти ќе им ја дадеме неопходната инфраструктура да ги изградат најнапредните модели за здравство, транспорт и енергетика, да набројам само неколку примери. Сето ова исто така е во служба на нашата агенда за технолошка независност, бидејќи сакаме напредната вештачка интелигенција да се развива токму овде, дома во Европа, од европски компании и европски истражувачи во согласност со европските вредности и основни права, вели портпаролот на ЕК Томас Регние. “

Како ќе се изберат изведувачите и рокови

Поединечни компании или конзорциуми ќе можат да поднесуваат свои понуди до Европската комисија. Во најавата е наведено дека Брисел ќе ги избере најдобрите понуди во почетокот на 2027 година. По доделувањето на средствата, изведувачите ќе имаат 18 месеци за да ги изградат центрите.

Проектот е замислен како големо јавно-приватно партнерство кое во својата финансиска рамка треба да вложи околу 30 милијарди евра во хардвер и инфраструктура. Поддржувачите тврдат дека таквата инвестиција ќе им даде на европските актери неопходната пресметувачка моќ за да развиваат напредни АИ решенија.

Но, планот не е без критики: дел од аналитичарите посочуваат сомнежи дека во Европа ќе постои побарувачка доволна да оправда вакви капацитети, а други предупредуваат дека проектот и натаму ќе зависи од САД, бидејќи најнапредните чипови се произведуваат од американски компании.

Фото: прес-материјал од настанот