BE miraton 6,1 miliardë euro për armatim të Ukrainës, hiqet kushti për prodhim vetëm evropian

Bashkimi Evropian ka miratuar 6,1 miliardë euro shtesë ndihmë për Ukrainën për blerje të pajisjeve ushtarake, me prioritet raketat interceptuese Patriot, të nevojshme për të rrëzuar raketat balistike ruse.

Hiqet kushti për prodhim vetëm evropian

Shuma, e cila u njoftua të premten, vjen nga huaja për mbështetje prej 90 miliardë eurosh. Për këtë vit nga ajo janë parashikuar 28,3 miliardë euro për ndihmë ushtarake dhe 16,7 miliardë euro për mbështetje buxhetore. Për t'u lejuar blerja e raketave Patriot, të prodhuara në Shtetet e Bashkuara, dhe e dronëve që përdorin pjesë kineze, u hoq kushti që pajisjet të jenë vetëm me origjinë evropiane.

Miratimi i ri prej 6,1 miliardë eurosh është shpërndarja e fundit brenda paketës prej 28,3 miliardë eurosh për ndihmë ushtarake këtë vit. Pagesat do të bëhen në faza pasi Brukseli të verifikojë kontratat që Kievi nënshkruan me kompanitë private.

Deri tani për mbrojtje janë shpërndarë 8,35 miliardë euro, dhe vendimi i fundit synon të përshpejtojë blerjet e sistemeve të avancuara të mbrojtjes ajrore që Ukraina i vlerëson si thelbësore për mbrojtjen e qyteteve dhe infrastrukturës.

Zyrtarët e BE thanë se ndryshimi është i nevojshëm për të nxitur dorëzimet e pajisjeve që konsiderohen kritike për kapacitetin mbrojtës të Ukrainës.

Foto: ДПА)