ЕУ повика на поголема заштита по сајбернападите врз фрижидерите во супермаркети во 10 држави
ЕУ предупредува дека нападите врз фрижидерите во супермаркети може да бидат обид за нарушување на синџирот на снабдување со храна.
Европската Унија повика на поголема заштита по бранот сајбернапади што го погодија системот за ладење во големи супермаркети во најмалку 10 европски држави, предупредувајќи дека може да се работи за намерен обид за нарушување на синџирот на снабдување со храна.
Проблеми беа пријавени во Белгија, Естонија, Финска, Ирска, Италија, Луксембург, Холандија, Португалија, Германија и Шведска. Неправилностите предизвикаа значително покачување на температурата во коморите за замрзнување и трговците беа приморани да ја фрлат погодената храна.
Според извештаите, температурата во некои фрижидери во маркетите се искачила дури до 50 Целзиусови степени, што ги направи намирниците небезбедни за употреба.
Загриженост за ранливостите во ланецот на снабдување
Претставници на Европската Унија истакнаа дека инцидентите не треба да се сметаат само за поединечни IT-падови, туку можат да претставуваат таргетиран напад врз дистрибуцијата на храна во рамките на блокот. Случајот го истакнува ризикот од поврзаноста меѓу оперативната технологија во трговијата и безбедноста на храната.
Сè уште никој не презел одговорност за овие сајбернапади, а националните служби и приватни компании спроведуваат истраги додека проценуваат колкав е обемот на штетата.
Инцидентите предизвикаа повици за брзо зајакнување на сајберзаштитата на критичната инфраструктура во трговијата и подобра координација меѓу земјите-членки за да се спречат слични прекини во иднина.
Фото: ДПА)
