ЕУ воведе целосна забрана на Бисфенол А (BPA) во пакувањата за храна

Европската Унија донесе одлука за целосна забрана на употребата на Бисфенол А (BPA) во сите материјали и производи кои доаѓаат во директен контакт со храната. Во опсегот влегуваат пластични садови, шишиња за вода, кутиите за ужинка и внатрешните премази на конзервите.

Во оценките за ризик, Европската агенција за безбедност на храната (EFSA) го истакна фактот дека штетни честички од амбалажата лесно преминуваат во храната и пијалаците. Бисфенол А е класифициран како ендокринолошки диструптор кој може да наруши хормонскиот баланс, да влијае на репродуктивното здравје и да има негативни ефекти врз имунолошкиот систем кај сите возрасни групи.

Безбедносната граница за дневен внес е драстично намалена — за дури 20.000 пати во споредба со претходните препораки — како резултат на повторната проценка на долгорочната изложеност. Во текот на процесот беа цитирани студии според кои BPA е детектиран кај 92% од анализираните примероци, што укажува на широко распространета експозиција.

Преоден рок и продажба

Забраната стапува на сила со 18-месечен преоден рок за да им овозможи на производителите време да ги прилагодат материјалите и технологиите. Одредени производи за повеќекратна употреба кои веќе се во продажба можат да останат на рафтовите најдоцна до јули 2027 година.

Очекувањата се дека компании од секторите за пакување, производство на кујнска опрема и добавувачи на конзервирана храна ќе ги променат материјалите и линиите на производи за да ги исполнат новите правила.

Како да се заштитите во домашни услови

• Проверувајте ја ознаката „Без BPA" при избор на производи.
• Заменете пластични кутии за чување и шишиња за вода со стаклени, инокс или керамички садови.
• Избегнувајте загревање храна во пластика — топлината го забрзува ослободувањето на хемикалиите.
• Читајте ги етикетите и преферирајте природни материјали за чување храна кога е можно.

Фото: прес-материјал од настанот